भांगरभूंय | प्रतिनिधी
उदकाच्या वापराविशीं जारी जातलीं मार्गदर्शक तत्वां
पणजी : आनीक १५ दीस पावस पडलोच ना आनी स्थिती अशीच रावली जाल्यार १ जुलय सावन उदकाच्या वापराचेर मर्यादा येतली. सध्या पुराय थारा इतलें उदक आसलें तरी उदकाच्या वावराविशीं मार्गदर्शक तत्वां जारी जातलीं. उदकाचो वापर गरजे इतलोच करचो, हे खातीर मार्गदर्शक तत्वां जारी जातलीं, अशें पेयजल खात्याचे मंत्री सुभाष फळदेसाय हांणी सांगलां.
राज्यांत मॉन्सून जरी आयला तरी आजूनय पावसाचो पत्तो ना. पावसाचें प्रमाण ५९.१ टक्के उणें आसा. दर दिसा वत पडपा सयत तापमान वाडत आसा. धरणांतल्या उदकाची पातळी उणी जायत आशिल्ल्यान उदकाचो उणाव निर्माण जावपाची भिरांत आसा. हे फाटभूंयेर उदकाच्या वापराविशीं मार्गदर्शक तत्वां जारी करपाचो निर्णय खात्यान घेतला.
पावस नाशिल्ल्यान उदकाचो उणाव निर्माण जावपाची भिरांत आसा. योग्य वेवस्थापनाक लागून आजून मेरेन उदकाचो उणाव जावंक ना. हाका लागून सगळ्या वाठारांत पयलीं भशेन उदकाची पुरवण सुरू आसा. तरी लेगीत जतनायेचे उपाय म्हूण उदकाच्या वापराविशीं मार्गदर्शक तत्वां जारी करपाचो निर्णय जालो. नळाचें उदक बरेच जाण पोरसांतलीं झाडां शिपपा खातीर तशेंच गाडयो धुवपा खातीर करतात. नळाच्या उदकाचो वापर झाडां शिपपा सयत गाडयो धुवपा खातीर करचो न्हय. तशेंच नळाच्या उदकाचो वापर वॉशींग सेंटरांनीय जाता. पियेवपाच्या उदकाचो हेर कामां खातीर वापर करपाक मेळचो ना, अशें मंत्री सुभाष फळदेसाय हांणी स्पश्ट केलां. पावस आनीक १५ दीस पडलो ना, जाल्यार उदकाच्या वापराचेर मर्यादा लागू करचे बगर हेर पर्याय आसचो ना, अशें तांणी सांगलें.
फाटल्या वर्सा मे सोंपपाकूच उदकाचो उणाव जातालो. योग्य वेवस्थापनाक लागून अंदूं उदकाचो उणाव आजून मेरेन जावंक ना. वास्को ८० एमएलडी उदकाची गरज आशिल्ली. सध्या वास्को शारा खातीर ९० एमएलडी उदक उपलब्ध जालां, अशें तांणी सांगलें.
एअरटेल कंपनीआड एफआयआर
तोरसे – पेडणे हांगा एअरटेल कंपनीकडल्यान कामा वेळार उदकाचें पायप फुटलें. हाका लागून उदकाची नाशाडी जाली. खात्यान एअरटेल कंपनीक नोटीस जारी केल्या. एफआयआर दाखल जावन उदकाच्या नाशाडीची भरपाय कंपनी कडल्यान वसूल जातली. पावस आयलो तरी भौशीक बांदकाम खातें वा वीज खात्या कडल्यान खणपाचीं कामां सुरू आसात. हाका लागून पायपलायन फुटपाची शक्यताय आसता, अशें तांणी सांगलें.
सांग्यार सगळ्या वाठारांक गरजे इतलें उदक मेळटा. आतां वेंचणूक लागीं पाविल्ल्यान उदकाचे प्रस्न मुखार येवपाक लागल्यात. जावपाक लागल्या. सांग्यार कागाळ आशिल्ले सुवातेर उपजिल्लोधिकार्यान पळोवणी करून उदकाची तपासणी लेगीत केली. आतां कसलीच समस्या ना.
झर्में- वाळपय उदकांत जंतू मेळ्ळे ते नळाच्या उदकांतल्यान मेळ्ळे काय भायल्यान ते उदकाच्या पायपलायनींत गेले, हाचो तपास सुरू आसा. अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
