भांगरभूंय | प्रतिनिधी
मुख्यमंत्री 22 हजार सुवातो भरतले : विश्वजीत
भरती प्रक्रिया निवड आयोगा वरवींच : डॉ. सावंत
जादूचे प्रयोग नाकात : विरोधक आक्रमक
भांगरभूंय । प्रतिनिधी
पणजी : भलायकी मंत्री विश्वजीत राणे हांणी गोंयांत सरकारी खात्यांत सुमार 22 हजार पदां रितीं आसात असो दावो केलो. मुख्यमंत्री जादूगार, वेंचणुके आदीं नोकर्यो दितले असो म्हाका विस्वास आसा अशें राणे हांणी सांगलें. तशेंच गोंयांत भाजपा सरकार परतून सत्तेर येतलें असोय विस्वास तांणी उक्तायला. राणे हांच्या विधाना उपरांत मुख्यमंत्री डॉ. प्रमोद सावंत हांणी प्रतिक्रिया दितना स्पश्ट केलें, सरकारी खात्यांनी रितीं पदां आसलीं तरी नोकर भरती प्रक्रिया निवड आयोगा वरवींच जातली.
गोंयांत सरकारी नोकर्यां विशीं विशेश क्रेझ आसा. सगल्या मतदारसंघांतल्या तरणाट्यांक सरकारी नोकरेची अपेक्षा आसा. सध्या विवीध सरकारी खात्यांनी 22 हजार रितीं पदां आसात. मुख्यमंत्री डॉ. प्रमोद सावंत हे जादूगार आशिल्ल्यान ते विधानसभा वेंचणुके पयलीं ह्यो सुवातो भरतले अशी खात्री आसा. अशें काम फकत भाजप पक्षूच करपाक शकता, अशें मंत्री राणे हांणी सांगलें. शुक्रारा पणजी जाल्ले नर्सींग परिशदे उपरांत तांणी माध्यमां कडेन संवाद सादलो.
आमी एक संघ म्हणून काम करतात. फकत एकाच मतदारसंघा खातीर न्हय पुराय राज्या खातीर काम करतात. तरणाट्यांक सरकारी नोकरेची अपेक्षा आसा. तांच्यो अपेक्षा आमचे मेरेन पावतात. मुख्यमंत्र्यांकूय राज्यांतल्या तरणाट्यांचो हुस्को आसा. हाका लागून वेंचणुके पयलीं रितीं 22 हजार पदां भरतले, असो विस्वास आमकां आसा. अशें जाल्यार तरणाट्यांक समाधान जातलें. आमी केल्ल्या उदरगतीच्या कामांक लागून फुडलें सरकारूय भाजपाचेंच आसतलें ही खात्री आसा, अशें तांणी मुखार म्हणलें.
ताचे पयलीं जाल्ले कार्यावळींत राणे हांणी सांगलें, फाटल्या कांय वर्सांनी गोंयांतल्या भौशीक भलायकी मळार व्हड उदरगत जाल्या. सरकारी हॉस्पिटलांनी आधुनीक उपकरणां, प्रशिक्षीत नर्शी, डॉक्टर उपलब्ध आसात. दुयेतींच्यो सरकारी नर्शी कडल्यान खूब अपेक्षा आसतात. मात नर्स कितलें काम करता हें तांकां खबर नासता. अशें जरी आसलें तरी नर्शींनी मोगाळ रावून काम करप गरजेचें. गोंयांत बेगिनूच नर्सरी कॅन्सराचें हॉस्पिटल सुरू जातलें. तातूंत 500 ते 600 नर्शीं खातीर नोकर्यो उपलब्ध जातल्यो, अशेंय राणे हांणी मुखार सांगलें.
सध्या गोंय वैजकी महाविद्यालयांतल्या पेडियाट्रीक रिहाब तशेंच आयव्हीएफ केंद्रांतल्या कांय कर्मचार्यांचो पगार हांव म्हज्या बोल्सांतल्यान दितां. असल्या कर्मचार्यांक सीएसआर निधींतल्या पगार दिवप शक्य आसा. ह्या कर्मचार्यांक कंत्राटी करपा विशीं हांवें सरकारा कडेन फायल धाडल्या. हे विशीं हांव मुख्यमंत्र्यां कडेन चर्चा करतलों, अशें मंत्री विश्वजीत राणे हांणी सांगलें.
गोंयाक जादूचे प्रयोग नाकात
भलायकी मंत्री विश्वजीत राणे हांणी मुख्यमंत्री डॉ. प्रमोद सावंत हांकां जादूगार म्हणीत गोंयांत 22 हजार सरकारी नोकर्यो निर्माण करपाचें विधान केल्ले खातीर काँग्रेसीन भाजप सरकाराचेर खर टिका केली.
काँग्रेस पदाधिकारी अमरनाथ पणजीकार हांणी सांगलें, हें विधानूच भाजप सरकाराचें अपेस, असहाय्यता आनी दिवाळखोरी उक्तडार हाडपी आसा. जेन्ना सरकारा कडेन दाखोवपा खातीर कामगिरी नासता, बेरोजगार तरणाट्यांक जाप नासता आनी जनते मुखार मांडपाक खर अहवाल नासता, तेन्ना ते जादू, भ्रम आनी राजकी कल्पनारंजन विकपाक लागतात, अशें तांणी म्हणलें.
गोंयचे हजारांनी सुशिक्षीत तरणाटे बेरोजगारी, कंत्राटी नोकर्यो, स्थलांतर आनी निरशेवणेक तोंड दितात. कांय मेजक्याच लोकांक राजकी आलाशिरो आनी लाव मेळिल्ल्याचो आरोप तांणी केला.
गोंयचे जनतेन सरकार वेंचलां तें प्रशासन चलोवपा खातीर, जादूचे प्रयोग दाखोवपा खातीर न्हय, अशें पणजीकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
