भांगरभूंय | प्रतिनिधी
कुडटरे जाल्ले सभेंत मुख्यमंत्री डॉ. प्रमोद सावंत हांचें आवाहन
काँग्रेसीचें राजकारण सोंपत चलिल्ल्याचो दावो
मडगांव: देशाचो आनी राज्याचो विकास फक्त प्रधानमंत्री नरेंद्र मोदीच करूंक शकतात हें आतां लोकां सयत काँग्रेसींतल्यान भाजपांत आयिल्ल्या आमदारांच्याय लक्षांत आयलां. काँग्रेसीचें राजकारण आतां सोंपलां. काँग्रेसीचे फुडारी भाजपांत येवपाक सुरवात जाल्या. मोदी हेच देशाचे आनी संवसाराचें फुडारपण करूंक शकतात हें पटिल्ल्यान फुडारी भाजपांत येवपाक लागल्यात. देशाचे उदरगती खातीर जात, धर्म कुशीक दवरून एकठांय येवपाची गरज आसा. लोकांनी भाजपाक सांगात दिवचो असो उलो मुख्यमंत्री डॉ. प्रमोद सावंत हांणी मारलो.
कुडटरे जाल्ले सभे वेळार मुख्यमंत्र्यांनी काँग्रेस फक्त एसटी समाजाचो मतां खातीर वापर करून घेतला, पूण एसटी समाजाक खरो भोवमान हो भाजप सरकाराच्या काळांत मेळिल्ल्याचें सांगलें.
ह्या वेळार मंत्री आलेक्स सिक्वेरा, आदले खासदार नरेंद्र सावयकार, दामू नाईक, चंद्रकांत कवळेंकार, अँथनी बार्बोझा, डॉ. स्नेहा भागवत बी मानेस्ता हाजीर आशिल्ले.
मुखार उलयतना सावंत हांणी म्हणलें, भाजपांत प्रवेश केले उपरांत मंत्री सिक्वेरा हांणी कामाची पद्दत पळयली आनी तांकां भाजप हो लोकां खातीर काम करीत आशिल्ल्याचें दिसून आयलें. राज्यांतल्या खंयच्याच आमदाराचें काम मुख्यमंत्री ह्या नात्यान आपणें आडायिल्लें ना. वालांकिनीक जांकां वचपाचें आसा तांकां देवदर्शना खातीर धाडून दितले. कुडटरी मतदारसंघांतल्यान लोकसभा वेंचणुकेंत मताधिक्य दिवचें. काँग्रेसीन केन्नाच लोकांचो विचार केलो ना. जाल्यार भाजप तळागाळांतल्या लोकांच्या विकासा खातीर काम करता. लोकांचे उपेगी येवजण्यो केंद्रांतल्यो आनी राज्यांतल्यो भाजप सरकारान हाडल्यो. काँग्रेसीचे फुडारी राहूल गांधी हांणी काँग्रेसीन काडिल्ली एकतरी येवजण सांगची अशें आवाहन मुख्यमंत्री डॉ. प्रमोद सावंत हांणी केलें.
गोंया खातीर फाटल्या 10 वर्साच्या काळांत भाजपान 35 हजार कोटींचो निधी मुळाव्या सुविधा खातीर केंद्र सरकारान दिला. येरादारीचे सेवेंत वाड केल्या, भलायकी, उदक, वीज ह्यो मुळाव्या सुविधा दिवपा खातीर भाजप सरकार लोकांच्या घरा मेरेन येता. नारी शक्ती, युवा शक्ती, गरीब कल्याण हे धर्तेर भाजप काम करता. कुडटरीचे आमदार रेजिनाल्ड हांणी भाजप सरकाराक तेंको दिला. कुडटरीतली भलायकी केंद्राची बुन्याद घालतले. हांगासरल्या मैदानाचो विकास, पुलीस स्टेशनाचो विकास हे भाजप सरकाराच्या काळांत करतले. देशाचे अर्थ वेवस्थेंत वाड जाल्या. नवो भारत आनी आत्मनिर्भर भारता खातीर अंत्योदय तत्वाचेर विकासा खातीर भघजप सरकाराक तेंको दिवचो. सीएए कायद्याची भिरांत खंयच्याच भारतीय नागरिकाक ना. खंयच्याच नागरिकाचें नागरिकत्व काडून घेवचे नात. हो कायदो शेजारच्या देशांत अल्पसंख्याक म्हूण जीण जगपी आशिल्ल्या विवीध धर्मांतल्या लोकांक नागरिकत्व दिवपा खातीर आसा अशें मुख्यमंत्र्यांनी सांगलें.
राजकी फायद्या खातीर एसटी समाजांतले कांय लोक आंदोलनां करून लोकांची दिशाभूल करतात. पूण लोकांनी समाजांत फूट घालपाचो यत्न करचो न्हय. तो मोडून काडपाची गरज आसा. दिल्लीक गेल्ल्या शिश्टमंडळांत मिशन पॉलिटिकलचे अॅड. जॉन फर्नांडीस आनी एसटी फुडारी रुपेश वेळीप हे लेगीत आशिल्ले. त्या वेळार विधेयक हाडून कायदो करपाचेर चर्चा जाली. त्या वेळार सगल्यांनी संमती दाखयिल्ली. आतां कांय त्रुटी वा दुबाव आसल्यार परतून राज्य सरकारा कडेन चर्चा करची आनी प्रस्न सोडवून घेवचे. तांणी आतां लोकांक चुकीचें कांय सांगून समाजांत फूट घालची न्हय. एसटी समाजान एकठांय येवचें आनी येता ते वेंचणुकेंत तेंको दिवचो अशें आवाहन अँथनी बार्बोझा हांणी केलें.
मजगतीं, भाजप खंयच्याच एका धर्मा खातीर काम करिना. जाल्यार सगल्या धर्मांक बरोबर घेवन काम करता. ताका लागून लोकांनी खंयच्याच वावड्यांचेर विस्वास दवरिनासतना लोकसभा वेंचणुकेंत भाजप उमेदवाराक वेंचून हाडचो अशें मंत्री आलेक्स सिक्वेरा हांणी सांगलें.
पोरणें गोंय चर्च वाठाराचो विकास भाजपाक लागून
पोरणें गोंय चर्चीच्या विकासा खातीर भाजपाच्या पर्रीकार सरकारान 50 कोटी रुपया खर्च केल्यात. फुडल्या वर्सा जावपी शवप्रदर्शना वेळार भाजप सरकार निधी खर्च करतलो. पोरणें गोंयचो विकास हो भाजप सरकाराच्या काळांतूच जाला. काँग्रेसीन कितें केलें हें खासदार फ्रान्सीस सार्दीन हांणी सांगचें. कांय लोक आपुणूय काय करिना आनी दुसऱ्या समाजांत फूट घालपाचो यत्न करता. भाजप हो सर्वधर्मियांक बरोबर घेवन सगल्यांक समान न्यायान काम करता अशें मुख्यमंत्री डॉ. प्रमोद सावंत हांणी सांगलें.
काँग्रेसीन लोकांक वापरून घेतलें
काँग्रेसीन फक्त लोकांक वापरून घेतलां. काँग्रेसीच्या काळांत एसटी समाजाक हक्का खातीर रस्त्यार येवचें पडलें आनी दोगां भावांक आपलो जीव व्हगडावचो पडलो. एसटी समाजाक 2003 वर्सा दर्जो हो भाजप सरकारान दिला. एसटी समाजान हाचे पयलीं केल्लीं आंदोलनां ही फक्त काँग्रेस सरकाराच्या विरोधांत केल्यात हें याद करून पळयात. काँग्रेसीन फक्त एसटी भावांचेर अत्याचारूच केला अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
