भांगरभूंय | प्रतिनिधी
मंत्री सुभाष शिरोडकारः हळदोणें मतदारसंघाची केली भोंवडी
भांगरभूंय । प्रतिनिधी
म्हापशें: म्हापशेंचे न्हंयेंत परतून हायसींथ (जलपर्णी) वनस्पत वाडपाक लागल्या. ताचेर सासणाचो उपाय काडचे खातीर शास्त्रज्ञांची मजत घेवची पडटली. ती मुळा सावन नश्ट करचे खातीर तंत्रज्ञान वा रसायनाचो वापर करचो पडटलो, अशी म्हायती शिंपणावळ मंत्री सुभाष शिरोडकार हांणी दिली.
बिरेस्तारा मंत्री शिरोडकार हांणी हळदोणें मतदारसंघाची भोंवडी केली. ह्या वेळार आमदार अॅड. कार्लुस फेरेरा आनी संबंदीत खात्याचे अधिकारी हाजीर आशिल्ले.
मंत्री शिरोडकार हांणी सांगलें, यंत्रसामुग्रीच्या आदारान जलपर्णी न्हंयेच्या पात्रांतल्यान काडली म्हणजे हो प्रस्न सुटावो जालो अशें ना. हो सासणाचो उपाय न्हय. ताका लागून शास्त्रज्ञांक आपोवन तांचे कडल्यान उपाय येवजण समजून घेवची पडटली. राष्ट्रीय दर्याविज्ञान संस्थेचे (एनजीओ) शास्त्रज्ञ आसात. तांचीय मजत घेवपाक मेळटली. जे वरवीं ह्या जलपर्णीचे वाडीच्या स्त्रोता जुस्त म्हायती मेळपाक मजत जातली आनी म्हापशें न्हय नितळ तशेंच जलपर्णी पासून सुरक्षीत दवरपाक मेळटली.
हे जलपर्णीच्यो बियो न्हंयेच्या उदकांत वा जमनीर खंयूय आसूं येतात. त्यो सोदून काडपाक मेळनात. कारण त्यो खूब पयस मेरेन पावतात आनी तांकां आंकरी फुटून ताची वाड जाता. ताका लागून ही वाड जावचीच न्हय हे खातीर शास्त्रज्ञांचो सल्लो वा तांची मजत घेवप योग्य थारतलें, अशेंय मंत्री शिरोडकार हांणी सांगलें.
मजगतीं, जून- जुलयांत शिंपणावळ खात्यान खाशेल्या मशिनाच्या आदारान न्हंयेच्या पात्रांतल्यान ही जलपर्णी काडिल्ली. पूण परतून ती वाडपाक लागिल्ल्यान हे न्हंयेचेर परतून जलपर्णीचें संकश्ट निर्माण जालां.
‘दरेकल्यान सैमाची राखण करची’
हळदोणें मतदारसंघांतल्या तळ्यांचीं दुरुस्तीकामां अमृत सरोवर येवजणे खाला हातांत घेतले. आदीं शेतकारूच गांवांतल्या तळ्यांची नितळसाण करताले. आतां ही स्थिती बदल्ल्या आनी सरकारी यंत्रणेक तीं कामां करचीं पडटात. गोंयांत 500 परस अदीक तळीं आसात. लोकांनी जागृत रावून न्हंयेंत वा तळयांनी कोयर उडोवचो न्हय. लोकांनी स्वताची जापसालदारकी वळखून सैमाची राखण करची, असो उलो मंत्री सुभाष शिरोडकार हांणी मारलो.
‘बांदकामाचो कोयर उडोवपाक सुवात आसची’
हालींसरास शार आनी गांवांची उदरगत जाता. ताका लागून बांदकामाचें टाकावू साहित्य ते लोक मेळत थंय उडयतात. ताका लागून हळदोणें आनी म्हापशेंच्या आमदारांनी एकवटान सुमार 5 हजार चौखण मिटर इतली सामान्य सुवात पळोवची. जंय हो कोयर उडोवपाक मेळटलो. फोडें वाठारांत आमी अशी सुवात पळयल्या. दरेका शारांत बांदकामाचो कोयर उडोवपा खातीर स्वतंत्र सुवात आसची, अशें मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
