भांगरभूंय | प्रतिनिधी
कतारांत चालू आशिल्ले संवसारीक फुटबॉल सर्तींत जर्मनीचो फुडले फेरयेंत पावपाचो मार्ग मात्सो कठीण जाला. जर्मनी आनी स्पेन ह्या पंगडां मदीं अल बायत स्टेडियमाचेर जाल्ले ई गटांतली मॅच 1-1 अशी बरोबरींत सोंपली. विशेश म्हणल्यार दोनूय गोल बदली खेळगड्यांनी केले.
स्पेना वतीन अल्वारो मोराटान जाल्यार जर्मनी खातीर निकलास फुलक्रुगान गोल केलो.
हे मॅची उपरांत चार खेपेचो संवसारीक वस्ताद जर्मनीक फुडले फेरयेंत सुवात मेळोवपाक कोस्ता रिका आडची मॅच खंयचेय परिस्थितींत जिखपाकूच जाय. तशेंच स्पेनान जपानाक हारोवपाक जाय.
मजगतीं, दोनूय वटेच्यान आक्रमक खेळाक सुरवात जाली. स्पेनान बॉलाचेर आपलो शेक दवरलो. पूण, प्रतिहल्ल्यांत जर्मनीचो पंगड चड धोकादायक दिसतालो.
स्पेनाच्या डॅनी ओल्मोन सातव्या मिनटाक गोल करपाक सामको लागीं पाविल्लो. पूण, जर्मनीचो गोलकीपर मॅन्युएल न्युएरान उत्कृश्ठ रितीन बॉल आडावन स्पेनाक निर्शेणी हाडली. ते उपरांत 33व्या मिनटाक फॅरान टोरेसाक लेगीत गोल करपाची संद आशिल्ली. पूण, ताणें बॉल क्रॉसबाराच्या भायर मारलो.
दुसरे वटेन अॅंटोनियो रुडिगरान हेडरा वरवीं बॉल गोलपोस्टांत धाडलो. पूण, व्हिडियो अॅसिस्टंट रॅफ्रीचे मजतीन तो गोल ऑफसायड घोशीत केलो. ताका लागून मध्यांतरा मेरेन दोनूय पंगड गोलाविणें बादाबाद उरले.
दुसऱ्या अर्दाच्या 54व्या मिनटाक स्पेनाच्या फेरान टोरेसाचे सुवातेर आयिल्ल्या अल्वारो मोराटो मैदानांत देंवलो. मैदानांत देंवना फुडें ताणें आपले कामगिरी वरवीं ठसो उमठोवपाक सुरवात केली. मॅचीच्या 62व्या मिनटाक जॉर्डी अल्बानान दिल्ल्या पासाचेर अल्वारो मोराटान गोल करून स्पेनाक 1-0 अशी आघाडी मेळोवन दिली.
संवसारीक फुटबॉल सर्तीच्या इतिहासांत बदली खेळगडो म्हूण सेगीत दोन मॅचींनी गोल करपी अल्वारो आतां मेरेनचो फक्त सवो खेळगडो थारलो. जाल्यार स्पेना वतीन अशें करपी तो पयलो खेळगडो थारलो.
जर्मनी ही लेगीत मॅच हारता काय कितें असो प्रस्न ताच्या चाहत्यांक पडपाक लागिल्लो. पूण, 83व्या मिनटाक निकलासान बरोबरीचो गोल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
