जर्मनीन जिखुनूय बिटकी कवळ्ळी

भांगरभूंय | प्रतिनिधी

अंदूंचे संवसारीक फुटबॉल सर्तींत लोकांचे अपेक्षे भायलो उरफाटो निकाल ई गटांत पळोवपाक मेळ्ळो. जर्मनीन कोस्टारिका पंगडाक 4-2 अशा गोल फरकांनी हारयलो खरो, तरी लेगीत जर्मनी पंगडाक बाद फेरयेंत सुवात मेळोवपाक जमली ना.

दुसरे वटेन जपानान बळिश्ट स्पेनाक 2-1 अशा फरकान हारोवन गटांतली पयली सुवात मेळयली. कोस्टारिका पंगडान स्पेना आडची मॅच 0-7 अशा गोल फरकांनी वगडायिल्ली. ताकाच लागून चार खेपेचो संवसारीक वस्ताद जर्मनीचें आव्हान सोंपलें. उत्कृश्ट गोलफरकाच्या आदाराचेर स्पेनान गटांत दुसरी सुवात मेळयत बाद फेरयेची पात्रताय मेळयली. कोस्टारिकाक सात गोलांनी केल्ली हार स्पेनाक फायदेशीर थारली. कारण जर्मनी आनी स्पेन दोनूय पंगडांचे दरेकी चार गूण जाल्ल्यान गोलफरकाच्या आदाराचेर स्पेनान बाद फेरयेची पात्रताय मेळयली.

जर्मनीक बाद फेरयेंत सुवात मेळोवपाक कोस्टारिका आड जैत सामकें गरजेचें आशिल्लें. जर्मनीन करात वा मरात मॅचींत पयल्या अर्दांत आक्रमक खेळ केलो. 10व्या मिनटाक सर्जी पयलो गोल करून खातें उगडलें. जर्मनीन ही आघाडी मध्यांतरा मेरेन कायम राखली. पूण, उपरांत कोस्टारिकाच्या येल्टसिनान 58व्या मिनटाक गोल करून जर्मनी कडेन बरोबरी सादली.

कोस्टारिकान दुसऱ्या अर्दाचे सुरवातीकूच बरोबरी सादिल्ल्यान पयलींच टॅन्शनांत आशिल्ल्या जर्मनीचें टॅन्शन गोलकीपर मॅन्युएलान आनीक वाडयले. ताणे 70व्या मिनटाक गोल वाटावपाच्या नादांत आत्मघातकी गोल केलो. ताका लागून कोस्टारिका 2-1 असो मुखार गेलो.

पूण, जर्मनीन फक्त तीन मिनटांनी दुसरो गोल करून मॅच 2-2 अशी बरोबरींत हाडली. काई हावेर्त्झान फुलक्रुगाचे सांगान हो गोल केलो. ताका लागून जर्मनीचो जिवांत जीव आयलो. मजगतीं, दुसरें अर्द सोंपपाक कांय मिनटां बाकी आसतना हावेर्त्झान आनीक एक गोल केलो. ताका लागून जर्मनी 3-2 असो मुखार पावलो. 89व्या मिनटाक निकोलस फुलक्रगान गोल करून जर्मनीक 4-2 अशें जैत मेळोवन दिवपाक मजत केली. पूण, तरी लेगीत जर्मनीक हाचो फायदो जावंक ना.

ई गटांतले दुसरे मॅचींत जपानान स्पेनाक 2-1 असो हारयलो. बरे तरेन पास दिवपाक स्पेन संवसारांत प्रसिद्ध आसा. ताची प्रचीत हे मॅचींत लेगीत आयली. ताणें बॉलाचेर आनी मॅचीचेर आपलें नियंत्रण दवरलें. स्पेनाच्या अल्वारो मोराटान मॅचीच्या 10व्या मिनटाक पयलो गोल केलो. पयल्या अर्दांत स्पेनान मॅचीचेर नियंत्रण दवरीत जपानाच्या गोलपोस्टाचेर चेपण हाडलें. पूण, जपानान बरे तरेन बचाव करीत स्पेनाचें आक्रमण आडावन धरलें. अखेरेक जपानाक बरोबरी करपाची संद दुसऱ्या अर्दाच्या तिसऱ्या मिनटाक मेळ्ळी.

रित्सू डोआनान 48व्या मिनटाक गोल करून मॅचींत 1-1 अशी बरोबरी सादली. ते उपरांत 51व्या मिनटाक तनाकान जपाना खातीर दुसरो गोल करून आघाडी मेळोवन दिली.

ते उपरांत स्पेनान जपानाचेर आक्रमण करून बरोबरी करपाचो यत्न केलो. स्पेनान वट्ट 12 खेपे जपानाच्या गोलपोस्टाचेर आक्रमण केलें. तातूंतले पांच शॉर्ट्स ऑन टार्गेट आशिल्ले. पूण, ताका एकूय गोल करपाक जमलो ना.

दुसरे वटेन जपानाच्या पांच आक्रमणांतले तीन ऑन टार्गेट आशिल्ले. विशेश म्हणल्यार तातूंतले दोन शॉर्ट्सांचेर गोल जाले.

स्पेनान मॅचींत 1058 पास दीत बॉलाचेर 83 टक्के ताबो मेळयिल्लो. तरी लेगीत ताका मॅच जिखपाक जमली ना. स्पेन हारिल्ल्यान ई गटांत फुटबॉल मोग्यांचे अपेक्षे भायलो उरफाटो निकाल पळोवपाक मेळ्ळो.