भांगरभूंय | प्रतिनिधी
म्हापशें पालिकेची कारवाय; एकता नगरांतलीं बांदकामां मातयेभरवण
म्हापशें: पालिकेची पूर्वपरवानगी घेनासतना जमीन माफिया दुबावीत सिद्धीकी उर्फ सुलेमान खान हाणें एकता नगर, हावसींग बोर्ड हांगासरले बाळकायिल्ले जमनींत बांदिल्लीं 6 बेकायदो बांदकामां म्हापशें नगरपालिकेन बुल्डोझराच्या सहाय्यान पुलीस बंदोबस्तांत मातयेभरवण केलीं.
फाटल्या 17 सप्टेंबर दिसा सिद्धीकी खान हाका नोटीस दिवन 15 दिसां भितर हीं बांदकामां स्वता जावन मोडून उडोवचीं असो आदेश जारी केल्लो. बांदकामां मातयेभरवण करपाक अपेशी थारल्यार पालिका हीं बांदकामां मोडून संबंदीत खर्च वसूल करतली अशी शिटकावणी संबंदितांक दिल्ले नोटीसींतल्यान दिल्ली.
पूण सुलेमान खान हाणें हीं बांदकामां मोडूंक नाशिल्ल्यान शुक्रारा पालिकेन तीं जेसीबीच्या आदारान मोडून जमीन पूर्वपदार हाडली. ही बळकायिल्ली जमीन 20 हजार 819 चौखण मिटर आसा.
पालिका मुख्याधिकारी चंद्रकांत शेटकार, पालिका अभियंतो आगुस्तीन मिस्किता आनी प्रशांत नार्वेंकार हांच्या फुडारपणा खाला पालिकेन अतिक्रमण हटाव पंगडाच्या पालवान ही कारवाय केली. ह्या वेळार पालिकेचे हेर अधिकारी, तशेंच जोड मामलेदार जेनीस परेरा आनी म्हापशेंचे पुलीस हाजीर आशिल्ले.
मजगतीं, फाटल्या जानेवारी 2022 वर्सा म्हापशें पालिकेन एकता नगर हावसींग बोर्डांतल्या म्हापशें शार चलता क्रमांक 2 पीटशीट क्रमांक 67 मदले सुवातेची पळोवणी केल्ली. त्या वेळार हे सुवातेत कांय बांदकामां उबारिल्लीं. तशेंच मालमत्ते सरभोंवतणी सरयांची वंय घाल्ल्याचें दिसून आयिल्लें. ते प्रमाण पालिकेन 12 जानेवारी 2022 दिसा संबंदिताक गोंय नगरपालिका कायदो 1968 च्या कलम 184(8) प्रमाण कारणां दाखय नोटीस दिल्ली.
उपरांत ह्या प्रकरणांत पालिका मुख्याधिकाऱ्या कडल्यान सुनावणी घेतली. जातूंत सिद्धीकी खान हाका ताची बाजू मांडपाची संद दिल्ली. पूण मालमत्ता आनी संरचणुकेची कायद्यान सिद्ध करपा खातीर ताणें कसलींच वैध कागदपत्रां सादर केलीं नात.
तशेंच सुनावणे वेळार तो हजर रावंक शकलो ना म्हूण कार्यवाही मुखार व्हरून ताचे आड 15 दिसांत बांदकामां मोडून उडोवपाचो पालिका मुख्यधिकाऱ्यांनी एक पक्षीय आदेश पारीत केल्लो.
मजगतीं, एकता नगरांतल्या वयले सुमार 20 हजार 819 चौखण मिटर जमीन उपनिबंधकांच्या बनावट रबर स्टॅम्पाचो वापर करून आनी बनावट कागदपत्रां कायदेशीर आशिल्ल्याचें भासोवन बळकायिल्ली. ह्या प्रकरणांत सिद्धीकी उर्फ सुलेमान खान (रा. माडेल, थिये) आनी हेरां आड म्हापशें पुलिसांनी सप्टेंबर 2020 वर्सा भारतीय दंड संहितेच्या 419, 465, 466, 467, 468, 471, 472 आनी 420 कलमा खाला बानवटगिरी आनी फटवणुकीचो गुन्यांव दाखल केल्लो. ह्या प्रकरणांत तेन्नाचे उपनिबंधक अर्जून शेट्ये हांणी पुलिशेंत कागाळ केल्ली. ह्या जमनीचो भुंयखंड करून विकपाक काडले उपरांत हो प्रकार जमनीच्या मूळ वारसदारांचे नदरेक आयिल्लो.
सिद्धीकी उर्फ सुलेमान खान हाचे आड गोंयांत 7 गुन्यांव नोंद आसात. हातूंत म्हापशें आनी वाळपयंत जमीन बळकावपाचे पांच गुन्यांव जाल्यार हणजूण्यां खून आनी म्हापश्यां खुनी हल्लो ह्या गुन्यांवांचो आस्पाव आसा. तशेंच सिद्धीकी आड दिल्लींत लेगीत गुन्यांव नोंद आसून दिल्ली पुलिसांनी ताची म्हापशें आनी गोंयांतल्या हेर वाठारांतली मालमत्ता गोठयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
