भांगरभूंय | प्रतिनिधी
भांगरभूंय । प्रतिनिधी
पेडणेः संसद ग्राम उदरगत येवजणे खाला उत्तर गोंयचो खासदार श्रीपाद नायक हांणी पेडणे तालुक्यांतलो इब्रामपूर व्हो गांव आर्दश गांव करपा खातीर वेंचून काडिल्लो. मात तांणी त्या गांवांत कसलेच तरेची उदरगत केली ना अशे आरोप जावपाक लागले. आतां सव्वे फावट उत्तर गोयांत लोकसभा वेचणुकेच्या प्रचाराक सुरवात करतना जमीन धनयांनी वेळार ना हरकत दाखले दिवंक नाशिल्ल्यान आदर्श गांव करपाक आडमेळे आयले अशें सश्टिकरण पत्रकारां कडेन उलयतना तांणी दिला.
धारगळ हांगच्या आयुश्य आयुर्वेद हॉस्पिटल प्रकल्पांत थळाव्या लोकांक रोजगार उपलब्द करून दिवपाची कबलात चालीक लावपाच्या वेळार आपले गाडयेक गोकर्ण हांगा अपघात जालो. ताका लागून पेडण्यांतल्या तरणाट्यांक रोजगार मेळोवन दिवपाक भलायकेचे आडमेळे आयले. अपघाताक लागून सगल्या गजालीं कडेन आडनदर जाली हे खातीर आपूण खंती आसां. जांच्यो जमनी गेल्यांत तांकां कबलाती प्रमाण रोजगार मेळोवन दिवपाचें काम आपूण करतलों अशें तांणी सांगलें.
श्रीपाद नायक हांणी बिरेस्तारा भगवती देवीक श्रीफळ ओंपून पेडणे मतदारसंघांतल्या आपल्या वेंचणूक प्रचाराक सुरवात केली. तांच्या वांगडा पेडण्याचो आमदार प्रवीण आर्लेकाक, पक्षाचे तिकेटी खातीर इत्सुक आशिल्ले आदले आमदार दयानंद सोपटे, पेडणे पालिकेचे नगरसेवक, सरपंच, उपसरपंच आनी भाजपा वावुरप्यांची फौज आशिल्ली. थळाव्या पत्रकारांनी नायक हांका इब्रामपूर आदर्श गांवां विशीं विचारलें तेन्ना दिल्ले मुजतींत इब्रामपुराक आदर्श करपाक जमलें ना हे खातीर खंत उक्तायली. मात ते खातीरचो दोश जमीन धनयांक दिलो. आदर्श गांव येवजण चालीक लावपाची जापसालदारी उत्तर गोंयच्या जिल्होधिकाऱ्यांची आसता. इब्रामपूर पंचायत मंडळान वेळार ना हरकत दाखले मेळोवन दिल्ले जाल्यार आदर्श गांव करपाक आडमेळे येनाशिल्ले अशें तांणी सांगलें.
पांच फावट खासदार म्हणून येवपा फाटलें गुपीत किदें, अशें म्हाका दिल्लींत खासदार विचारतात. उत्तर गोंयांतल्या भाजपाच्या वावुरप्यांक लागून लोका म्हाका वेंचून दितात आनी हे खेपे आपूण डबल हॅट्ट्रीक करतलो अशें तांकां सांगून आयलां अशी म्हायती तांणी दिली. फाटल्या 25 वर्सांत तुमी उत्तर गोंयांत कसली उदरगत केली आनी हाचे फुडें कसली उदरगत करपाक वेंचणूक लडयतात, अशें पत्रकारांनी विचारलें तेन्ना उदरगत ही सोपपाची प्रक्रिया आसना. उदरगतीच्यो नव्यो कल्पना नागरीक, सरकार, आमदार, आनी पंचायत मंडळां दित आसतात. हे फावट रोजगार दिवपाक आपलें प्राधान्य आसतलें अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
