जमशेदपूराचें जबरदस्त प्रदर्शन

भांगरभूंय | प्रतिनिधी

इंडीयन सुपर लीग (आयएसएल 2023-24) हातूंत काल जमशेदपूर एफसीन उत्कृश्ट खेळ करून 0-2 असो फाटीं आसून लेगीत उपरांत चेन्नयीयन एफसीक 2-2 असो बरोबरींत आडायलो.

चेन्नयीयन एफसीक सेगीत तिसरे मॅचींत बरोबरीचेर समाधान मानचें पडले, जाल्यार जमशेदपूरान फाटल्या चार मॅचीं सावन चालू आशिल्लो हारीचो क्रम आडायलो. ह्या निकालान जमशेदपूर एफसीचो आत्मविस्वास निश्चीत वाडला आसतलो. दुसरे वटेन चेन्नयीयन एफसीक लिगेच्या इतिहासांत सवे खेपे 2-0 अशी आघाडी घेवन लेगीत जैत जोडपाक जमलें ना.

आयएसएलाचो पयलो टप्पो सोंपत आयला. हे फाटभुंयेर जमशेदपूर एफसी आनी चेन्नयीयन एफसीक आतां दरेक गुणा खातीर संघर्श करचो पडटलो. आठ मॅचींनी खेळून फकत एकूच जैत मेळोवपी जमशेदपूराक फाटल्या चार मॅचींनी हार घेवची पडल्या. पूण, काल घरच्या मैदानाचेर खेळटना ताचो जैत जोडपाचो यत्न आशिल्लो. पूण, चेन्नयीयन एफसीन 9व्या मिनटाक गोल करून आपलें खातें उगडलें. राफेल क्रव्हेलारोच्या क्रॉसाचेर फारुख चौधरीन हेडरा वरवीं उत्कृश्ट गोल केलो. अंदूं फेब्रुवारींत जमशेदपूरान 0-1 असो फाटीं आसून लेगीत उपरांत जैत मेळयिल्लें. ताचीच पुनरावृत्ती करपाचें आव्हान ताच्या मुखार आशिल्लें.

15व्या मिनटाक जमशेदपूरा वतीन बरोबरी खातीर पयलो यत्न जालो. 20व्या मिनटाक चेन्नयीयन एफसीच्या खेळगड्यांचो फिशालकाय खेळ आनी योग्य ताळमेळ पळोवन जमशेदपूराचे खेळां मोदी अजाप भरीत जाले. जमशेदपूरा वतीन सेईमिनलेन डॉंगेलान सातत्यान यत्न केले. पूण, चेन्नयीयनाच्या डिफॅण्डरांनी तितलोच बरो खेळ केलो.

राफेलान 28व्या मिनटाक चेन्नयीयन खातीर मारिल्लो ऑन टार्गेट यत्न आडायलो. 31व्या मिनटाक जमशेदपूरान मॅचींतलें सर्वोत्तम खेळाचें प्रदर्शन घडयलें. लालदिनपुईयाचो हो यत्न चेन्नयीयनाच्या गोलकीपरान आडायलो. पूण, हो एक यत्न जमशेदपूराच्या खेळां मोग्यांच्या आंगांत उर्बा हाडपी थारलो.

दुसरे वटेन 40व्या मिनटाक चेन्नयीयन एफसीक दुसरें येस फावो जालें. जॉर्डन मरेन फ्री किकीचेर फिशालकायेन पास दिलो आनी निंगथॉय मितेईन चेन्नयीयनाची आघाडी 2-0 अशी केली.

जमशेदपूरान गोल करपा खातीर खूब संदी तयार केल्यो. पूण, फायनल टच दिवपाक ते फसले. पूण, पयल्या अर्दाच्या इंज्युरी टायमांत (45+4) लालदिनपुईयान हेडरा वरवीं जमशेदपूरा वतीन पयलो गोल केलो. ह्या गोलान जमशेदपूराचो आत्मविस्वास बरोच वाडलो. हाचो परिणाम दुसऱ्या अर्दांत पळोवपाक मेळ्ळो.

दुसऱ्या अर्दांत जमशेदपूरान गोल करपाच्यो साबार संदी तयार केल्यो. अखेरेक मॅच सोंपपाक कांय मिनटां बाकी आसतना जमशेदपूराक येस फावो जालें. निखिल बार्लाच्या क्रॉसाचेर डॅनिएल चिमाने हाणें हेडर वरवीं गोल करून आपल्या पंगडाक बरोबरी सादून दिली.