भांगरभूंय | प्रतिनिधी
पेडणें, प्रतिनिधी: पेडणेची विजेची समस्या सोडोवपाचो आपूण यत्न करतां. तशेंच जमनी पोंदच्यान लायटीच्यो सरयो घालतकच लोकांक जावपी त्रास पयस जातले, अशें आमदार प्रवीण आर्लेकार हांणी सांगलें. गडेकर भाटलें, पेडणें हांगां वट्ट १७ लाख रुपया खर्च करून उबारिल्ल्या नव्या वीज ट्रान्सफॉर्मरांच्या उक्तावणा वेळार ते उलयताले.
ह्या वेळार पेडणेचे नगराध्यक्ष सिद्धेश पेडणेंकार, उपनगराध्यक्ष आश्विनी अरविंद पालयेंकार, नगरसेवक विष्णू उर्फ बाप्पा साळगांवकार, नगरसेवक माधव सिनाय देसाय, नगरसेवक शिवराम तुकोजी, नगरसेविका विशाखा गडेकार, नगरसेविका राखी कशालकार, अभियंते वाटू सावंत, अरविंद पालयेंकार, कंत्राटदार संतोष कोरखंनकार आनी हेर नागरीक हाजीर आशिल्ले.
आमदार आर्लेकार हांणी पेडणें मतदार संघांतल्या ज्या वाठारांत विजेची समस्या आसा ती सोडयतलों. तशेंच मुखेल आनी भितरल्या रस्त्यांचेर स्ट्रीट लायटी नात, थंय त्यो टप्प्याटप्प्यान घालतलों अशें सांगलें. पुराय मतदारसंघ उजवाडान भरपाचो आपूण यत्न करतां. नागरिकांनीय सहकार्य करचें. जशें नवो ट्रान्सफॉर्मर उबारतना जागो जाय आसता, रस्ते रूंद करतना जागे गरजेचे. तशेंच विजेचे खांबे उबारतनाय जागो गरजेचो. देखून नागरिकांनी, भाटकारांनी सहकार्य करचें, असो उलो आमदारान मारलो.
नगराध्यक्ष सिद्धेश पेडणेंकार हांणी पालिका वाठारांत जमनी पोंदच्यान लायटीच्यो सरयो घालून फुडाराक येवपी समस्या पयस करच्यो अशी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
