भांगरभूंय | प्रतिनिधी
दस्तावेजांच्या तपासणी पयलीच जातली वेवहारांची नोंदणी
ईडी वरवीं जातली दस्तावेजांची तपासणी
पणजी, प्रतिनिधी : विदेशात रावपी गोंयकारांच्या जमीन खरेदी/ विक्री वेवहारांची नोंदणी दस्तावेजांच्या तपासणी पयलीच सबरजिस्ट्रारांनी करची, असो आदेश कायदो फाट्यान जारी केला. ह्या आदेशाक लागून तांचे जमीन खरेदी/ विक्री वेवहारांची नोंदणी आता रोकडीच जातली. कळाव जावचो ना. ह्या आदेशाक लागून ओसीआय गोंयकारांक (विदेशात रावपी गोंयकार) थाकाय मेळ्या.
इतलो तेप सबरजिस्ट्रार कागदपत्रांच्या तपासणे खातीर बरोच वेळ घेताले. हाका लागून नोंदणीक कळाव जातालो. हे आदेशाक लागून आता सबरजिस्ट्रारांक वेळ काडपाक मेळचो ना. नोंदणी दस्तावेजांच्या तपासणी पयलीच जातली आसली तरी उपरांत ईडी वरवीं तपासणी जातली. ओसीआय वाल्यांच्या सगळ्या वेवहारांच्यो फायली म्हयन्यातल्यान एकदा ईडीक धाडच्यो पडटल्यो. हाका लागून गैरवेवहार करपी ओसीआयवाल्यांच्या फाटल्यान ईडीची चवकशी सुरू जातली. हाका लागून खरेदी/ विक्रीचे वेवहार पारदर्शकपणान करपाची जापसालदारी वेवहार करपी ओसीआयवाल्यांची आसतली. कायदो फाट्यान अशें आदेशात स्पश्ट केलां. ज्या जमनीचो वेवहार जाता ती शेत जमीन ना, अशी खातरजमा केल्याचो उल्लेख नोंदणी पत्राचेर करचो पडटलो.
वेवहारा वेळार फेमा वा रिझर्व्ह बँकेच्या मार्गदर्शन तत्वांक पालव दिला काय ना, ताची तपासणी एनफोर्समेंट डायरेक्टोरेट (ईडी) करतलें. हाका लागून जमीन खरेदी/ विक्रीत गैरवेवहार करतल्यांचेर थेट ईडी कारवाय करतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
