जनगणना आनी मतदारसंघ फेररचणुके पयलीं सांगें एसटी खातीर आरक्षीत करचो न्हय
भांगरभूंय | प्रतिनिधी
सांगें ग्रामस्थांचें केंद्रीय मंत्री श्रीपाद नायक हांकां निवेदन
पणजी : नव्यान जनगणना आनी मतदारसंघ फेररचणुके पयलीं सांगें मतदारसंघ हो अनुसूचीत जमाती खातीर(एसटी) आरक्षीत दवरचो न्हय, अशी मागणी सांगें ग्रामस्थांनी केली. हे मागणेचें निवेदन तांणी केंद्रीय ऊर्जा राज्य मंत्री श्रीपाद नायक हांकां आयज सादर केलें. ह्यान पयलीं तांणी हे मागणेचें निवेदन मुख्यमंत्री डॉ. प्रमोद सावंत हांकां सादर केल्लें.
केंद्रीय मंत्री श्रीपाद नायक हांणी गृहमंत्री अमित शहा तशेंच हेरांकडेन चर्चा करून हे मागणेची फाटपुरवण करची, अशी मागणी ग्रामस्थांनी केल्या. निवेदनाचेर २६ ग्रामस्थांच्यो सयो आसा. हातूंत पंच, सरपंच अशा थळाव्या लोकप्रतिनिधींचो आस्पाव आसा. २००१चे जनगणनेचेर आधारीत २००८ वर्सा मतदारसंघ फेररचणुकेचो आदेश जारी जालो. ह्या आदेशा प्रमाण सध्याच्या सांगें मतदारसंघाची शिम आसा. सांगें मतदारसंघांत एसटी लोकसंख्या आसली तरी ती कितली आसा, ताची ठोस म्हायती उपलब्ध जावपाक जाय. एसटी समुदायाक आरक्षण मेळपाक जाय मात तें योग्य प्रक्रिया करून मेळपाक जाय. पयलीची जनगणना वा २००८वर्सा जारी जाल्या. मतदारसंघ फेररचणुके प्रमाण सांगें मतदारसंघ आरक्षीत दवरप हेर समाजाचेर अन्यायकारक थारतलें. हाका लागून जनगणना आनी मतदारसंघ फेररचणुके उपरांत एसटी आरक्षण लागू करचें, अशी मागणी करपी निवेदन सांगेच्या लोकांनी केंद्रीय मंत्र्यांक सादर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
