भांगरभूंय | प्रतिनिधी
इंडियन मेडिकल असोसिएशनाच्या गोंय फांट्यान जारी केली मार्गदर्शक तत्वां
पणजी, बातमीदार ः देशांतल्या जायत्या शारांनी उश्णताय वाडल्या आनी गोंयांतय उश्णताय ल्हार येवपाची शक्यताय आसा. हे फाटभुंयेर गोंयकारांनी उश्णताय टाळपा खातीर योग्य जतनाय घेवची अशें आवाहन इंडियन मेडिकल असोसिएशनाच्या गोंय फांट्यान केलां. हे संबंदी फांट्यान प्रसिद्धी पत्रक जारी करून घेवपाक जाय आशिल्ल्या उपायांची म्हायती दिल्या.
भारतीय हवामान खात्यान देशभरांत सदचे परस चड गरमी आनी उश्णताय वाडपाची शक्यताय पयलींच उक्तायल्ली. आतां देशांतल्या जायत्या शारांनी तापमान 40 अंश सेल्सियस परस चड वाडलां. तापमान सेगीत सुमार तीन दीस ४० अंश सेल्सियसाच्या लागसार उरल्यार ताका उश्णतायेची ल्हार म्हण्टात. सध्या गोंयांत तापमान सुमार 33 ते 34 अंश सेल्सियस आसा. तशेंच आर्द्रतायेचें प्रमाणय चड आसा. फुडल्या कांय दिसांनी तापमान 40 मेरेन पावपाची शक्यताय आशिल्ल्यान इंडियन मेडिकल असोसिएशनाच्या गोंय फांट्यान गोंयकारां खातीर मार्गदर्शक तत्वां जारी केल्यांत.
१. चड काळ सुर्याचो उजवाड टाळचो : चड काळ थेट सुर्याच्या उजवाडाक रावप टाळचें. कामा खातीर भायर सरपाचे आसल्यार दनपारचें वचपाचें टाळचें. सावलेंच्या सुवातेर विसव घेवचो.
२. उदक खूब पियेवचें : दीसभर भरपूर उदक पियेवचें. कुडींतले मीठ उणे जाल्यार ओरल रिहायड्रेशन सोल्यूशन्स (ORS), नाल्लाचें उदक, घरगुती थंड पेयां वा लिंबाचे उदक पियेवचें.
३. चड व्यायाम करप टाळचो : चड घाम येवप आनी कुडीतलें उदक उणें जावचें न्हय म्हणून खर व्यायाम करप टाळचें.
४. ज्येश्ठ नागरिक आनी भुरग्यांची खाशेली जतनाय घेवची: ज्येश्ठ नागरिकांनी आनी भुरग्यांनी दनपारां 12 ते दनपारां 3 मजगतीं सुर्याच्या खर किरणांच्या संपर्कात चड काळ रावचें न्हय.
५. सुती कपडे वापरात : थंड आनी आरामशीर रावपा खातीर हलके, सैल-फिटिंग आनी श्वास घेवपाक योग्य अशें हलके कपडे घालचे. खास करून सुती कपडे.
६. दोळ्यांची जतनाय घेयात : घरां भायर आसतना थेट सुर्याच्या उजवाडा पासून स्वताची राखण करपा खातीर सनग्लासेस, तोपी वा सत्री वापरात.
७. आहार संतुळीत दवरात : सोरो, कॅफीन, कार्बोनेटेड पेयां मर्यादीत करात. पचपाक जड, प्रथिनां चड, खूब तेलकट, तळिल्लें, तिखट आनी मसाल्याची खाणां चड खावची न्हय.
८. चक्कर येवप, अशक्तताय जाणवप, मळमळप वा थकवाचो अणभव आयल्यार रोखडीच वैजकी मजत घेवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
