भांगरभूंय | प्रतिनिधी
वागातोर ड्रग्ज अतिसेवन प्रकरण
म्हापशें: हणजूण्यां एका कल्बांत पार्टी वेळार घुंवळे वखदां घेवन भलायकी गंभीर आशिल्ल्या सारा खान (32, दिल्ली) हिचे सयत तिचो इश्ट डॉ. अभिषेक विक्रम सिंग (40, वाराणसी, उत्तर प्रदेश) आनी अनवळखी घुंवळे वखदांची पुरवण करप्या आड कळंगूट पुलिसांनी गुन्यांव दाखल केला.
ही घडणूक फाटल्या आयतारा 20 वेर घडिल्ली. जखमी आनी दुबावीत फाटल्या शेनवारा 19 वेर गोंयांत आयिल्ले, आनी ते सिकेरी एका नखेत्री हॉटेलांत देंविल्ले. तेच रातीं 9 वरांच्या सुमाराक वागातोरा लुमिना नांवाच्या बीच क्लबांतले पार्टींत दोगांय वांटेकार जाल्लीं. फांतोडेर 5 वरांच्या सुमाराक जखमी बायलेची भलायकी इबाडिल्ल्यान पार्टी अर्द्यार सोडून दोगूय हॉटेलांत आयलीं
हॉटेलांतले कुडींत ती ओकूंक लागिल्ल्यान तिका हॉटेलांतल्यान कांदोळे भलायकी केंद्रांत दाखल केली. उपरांत सांजवेळा भलायकी आनीक इबाडिल्ल्यान तिचो इश्ट दुबावीत डॉ. सिंग हाणें तिका पणजेंतल्या खाजगी हॉस्पिटलांत फुडल्या उपचारा खातीर दाखल केली. थंय तिका अतिदक्षता विभागांत वेंटिलेटराचेर दवरल्या.
कळंगूट पुलिसांक खाजगी हॉस्पिटलांतल्यान ड्रग्जाचे अतिसेवन जाल्ल्या दुयेंती विशीं म्हायती दिली. ते प्रमाण पुलिसांनी दुबावीत इश्ट डॉ. सिंग हाची चवकशी केली. तेन्ना पार्टी खातर क्लबांत वच्चें पयलीं क्लबाचे भायर आमी एका मनशा कडल्यान ड्रग्ज विकते घेतलें. ह्या ड्रग्जाचे अतिसेवन जाल्ल्यान इश्टीण सारा खान हिची भलायकी इबाडिल्ल्याची म्हायती चवकशे वेळार दुबावीत डॉ. सिंगान दिली.
ह्या कबुलीच्या आदाराचेर पुलिसांनी बुधवारा सांजवेळा जखमी बायल आनी तिच्या इश्टा सयत अनवळखी ड्रग्जाची पुरवण करप्या आड भादंसं च्या 336 आनी घुंवळे वखदां प्रतिबंधक कायदो कलम 21 (अ) आनी 27 कलमा खाला गुन्यांव नोंद केला. फुडलो तपास पुलीस करतात.
मजगतीं, ह्या ड्रग्जाच्या अतिसेवनाक लागून जखमी जाल्ल्या बायलेच्या कुटुंबाक म्हायती दितकूच तिचो भाव आनी भयण गोंयांत दाखल जाल्यात. जखमी बायलेची भलायकी हुस्को करपा सारकी आसा. ताका लागून तिचो जबाब नोंद करूंक मेळ्ळो ना. दुबावीत इश्टाच्या म्हायतीच्या आदारान आमी गुन्यांव नोंद केला आनी ड्रग्जाची पुरवण करप्याचो सोद सुरू आसा. ड्रग्ज हो समाजा खातीर वायट आनी घातक आसा. ताका लागून घडणूक खंयच्याय पुलीस स्टेशनाचे हद्दींत आसली तरी आमी गुन्यांव नोंद करून तपास सुरू केला अशी म्हायती पुलीस निरिक्षक दत्तगुरू सावंत हांणी दिली.
तीन म्हयन्यां पयलीं 23 ऑगस्ट दिसा अशेच तरेन ड्रग्जाच्या अतिसेवनाक लागून भाजपा फुडारी तशेंच टीक टॉक स्टार सोनाली फोगट हिका मरण आयिल्लें. उपरांत आतां तीन म्हयन्यांनी परतून ड्रग्जाच्या अतिसेवनाची ही घडणूक घडिल्ल्यान हणजूण-वागातोर हांगा आयजूय उक्तेपणान क्लबाचे भायर ड्रग्जाची विक्री जायत आशिल्ल्याचें उक्तडार आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
