भांगरभूंय | प्रतिनिधी
मडगांव, प्रतिनिधी: छत्रपती शिवाजी महाराज हे चेंपणा आड लढपी आनी जनतेच्या हक्का खातीर उबे रावपी पारदर्शी म्हान फुडारी आशिल्ले. तांचो धर्मीक एकवटाचेर विस्वास आशिल्लो. देखून छत्रपतीन सगळ्या जाती- धर्मांतल्या लोकांक आदरान वागयले, केन्नाच भेदभाव केलो ना, अशें काँग्रेसीचे अध्यक्ष अमित पाटकार हांणी आयज सांगलें.
सां जुझे दे आरीयल हांगा छत्रपती शिवाजींच्या पुतळ्याच्या स्थापने मजगतीं जाल्ल्या समाजीक ताणाचेर प्रतिक्रिया उक्तायतना तांणी सांगलें, सगळीं कायदेशीर कामां पुराय करून, गरजेच्यो परवानग्यो घेतिल्ल्याची खात्री करूनच ह्या पुतळ्याची स्थापना करप समाजकल्याण मंत्री सुभाष फळदेसाय हांची जापसालदारकी आशिल्ली. थळाव्या लोकांक विस्वासांत घेवनूच खंयचोय उपक्रम हातांत घेवप सदांच फायद्याचें आसता.
लोकसभा वेंचणूक लागीं पाविल्ल्या भाजपान परत धर्मीक ‘ध्रुवीकरण’ सुरू केलां अशें स्पश्ट दिसता. गोंयकारांनी जाती, धर्मां मदीं एकवट दवरचो, असो उलो मारीत फुटीर शक्तींक आमचे मदीं फूट घालपाक कशीच दिवंनाकात अशेंय अमित पाटकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
