भांगरभूंय | प्रतिनिधी
भांगरभूंय । प्रतिनिधी
बेळगांवः बेळगांव- गोंय चोर्ला घाट रस्ताच्या कर्नाटकांतल्या हद्दींतल्या रस्त्याच्या डांबरीकरण कामाक निमाणे सुरवात जाली. कर्नाटकांतले हद्दींत ह्या रस्त्याची सामकी अवतिकाय जाल्ली. राष्ट्रीय म्हामार्ग प्राधिकरणान कामाक सुरवात केल्ल्यान वाहनचालकांनी तशेंच प्रवाश्यांनी खोस उक्तायल्या.
पिरणवाडी- साखळी रस्त्याच्या दुपदरीकरण कामाचें पोरूं फेब्रुवारी म्हयन्यांत केंद्रीय येरादारी मंत्री नितीन गडकरी हांणी उक्तावण केलले. मात पर्यावरण आनी राना खात्या कडल्यान फावो ते परवाने मेळपाक कळाव जाल्ल्यान प्रत्यक्ष कामाक मात सुरवात जाली नाशिल्ली. गोंय राज्याचे हद्दींतलो रस्तो सामको बरो आशिल्लो तरी कर्नाटकाचे हद्दींत किनयें आनी चोर्ला मजगतींच्या रस्त्यार फोणकुलां पडिल्ल्यान ताचे वयल्यान वाहनां चलोवप कुस्तार जातालें. म्हामार्ग प्राधिकरण तशेच लोक प्रतिनिधी कडेन व्हो रस्तो सारको करपाची मागणी जाताली.
रस्तो सारको करपाचें काम केन्ना सुरू जातलें हें कळनाशिल्लें. जे कडेन रस्तो सामको इबाडला तो सारको करपा खातीर म्हामार्ग प्राधिकरणान खासा परवानगी घेवून कामाक सुरवात केल्या. फाटल्या सप्तकांत रस्त्याचें स्क्रेपिंग आनी नितळसाणेचें काम करून आतां डांबरीकरणाचें काम सुरू केलां.
जांबोटी आनी चोर्ला मजगतींच्या 43 किलोमीटर रस्त्या वयलीं फोणकुलां आमी पुरयल्यांत. ह्या रस्त्याची पळोवणी केल्या उपरांत कंत्राटदाराक डांबरीकरण करपाक आमी सांगलें. ह्या रस्त्या वयल्यान वाहनां बरे भशेन व्हरपाक मेळपाक जाय हाचे कडेन आमचें लक्ष आसा अशें म्हामार्ग प्राधिकरणाचो प्रकल्प संचालक भुवनेश कुमार हाणे सांगलें. रस्त्याचें काम दर्जेदार जावचें हे कडेन आमची नदर आसा अशें इंजीनियर लक्ष्मी व्यंकटेश हिणे सांगलें. सुमार 2 कोटी रुपये खर्च करून रस्तो सारको करपाचें काम करतले. गरज पडल्यार चड पयशे खर्च करपाची आमची तयारी आसा अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
