भांगरभूंय | प्रतिनिधी
वाळपय: गोंय-बेळगांव मजगतीं, चोर्ला म्हामार्गार झोंपांनी लिपोवन दवरिल्लो सुमार 25 हजार रुपयांचो देशी सोरो वाळपय पुलिसांनी जप्त केलो. ही कारवाय काल (बिरेस्तारा) सकाळीं पुलीस निरिक्षक विदेश शिरोडकार हांच्या मार्गदर्शना खाला केली.
मजगतीं, जप्त केल्लो सोरो वाळपय अबकारी कचेरेचे सुवादीन केला. सद्या तरी अनवळख्या आड गुन्यांव दाखल केला. पूण केरी हांगासरल्या चेक नाक्यार खर तपासणी प्रक्रिया हातांत घेतिल्ली आसून लेगीत हो सोरो कसो नाक्या वेल्यान गेलो अशे तरेचे प्रस्न लोक उक्तावंक लागल्यात.
वाळपय पुलिसांक चोर्ला म्हामार्गार एके सुवातेर व्हड प्रमाणांत सोऱ्याचो सांठो लिपोवन दवरिल्ल्याची म्हायती मेळ्ळी. निरिक्षक विदेश शिरोडकार हांणी रोखडीच घडणूक थळार धांव घेवन मुखेल मार्गा वेल्या कांय अंतराचेर एका गच्च भरिल्ल्या झोंपांत हो सोरो लिपोवन दवरिल्लो. सोद घेतले उपरांत हो सोरो सांपडलो. ह्या वेळार पंचनामो करून ताचें बाजारपेठेंतलें मोल पळयत जाल्यार तो सुमार 25,000 रुपया जायत आशिल्ल्याची म्हायती वाळपय पुलीस निरिक्षकां कडल्यान मेळ्ळी.
घडणुकेचो पंचनामो करून हो सोऱ्याचो सांठो वाळपय अबकारी कचेरेचे सुवादीन केलो. हे विशीं अदीक तपास करतात अशें निरिक्षकांनी स्पश्ट केलें. मजगतीं, हो सोरो कोणाचो हे विशींची म्हायती मेळिल्ली ना. हाका लागून सद्या तरी अनवळख्या आड गुन्यांव दाखल केला अशी म्हायती निरिक्षक शिरोडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
