चोर्ला घांटार प्रवासी बशीक अपघात: १२ जाणां जखमी
भांगरभूंय | प्रतिनिधी
वाळपय, प्रतिनिधी: सोलापूर- महाराष्ट्रांतल्यान गोंयचे दिकेन येवपी एआर 01- जे- 4167 ह्या क्रमांकाची खाजगी बस चोर्ला घांट वाठारांत उमथल्ल्यान १२ प्रवाशी जखमी जाले. ही घडणूक आयज सकाळीं घडली. जखमी जाल्ल्यां मदल्या १० जाणांक फुडल्या उपचारा खातीर गोवा मेडिकल कॉलेजींत धाडल्यात. चालकाचें गाडये वयल्यान नियंत्रण सुटिल्ल्यान हो अपघात जालो. ह्या अपघातांत बसीचें कांय प्रमाणांत लुकसाण जालां.
हे विशीं म्हायती प्रमाण, एस आर एस नांवाची बस आयज सकाळीं चोर्ला घाट वाठारांतल्या एका मोडणार उमथली. चालकाचें बसी वयल्यान नियंत्रण गेल्ल्यान हो अपघात जालो. हे बसींत २८ प्रवासी आशिल्ले. तांतले १३ प्रवासी जखमी जाले. त्या सगळ्यांक रोखडेच सरकारी सामाजीक हॉस्पिटलांत उपचारा खातीर दाखल केले. तांतल्या १० जाणांची प्रकृती गंभीर आशिल्ल्यान तांकां फुडल्या उपचारा खातीर गोंय मेडिकल कॉलेजींत दाखल केलें. वैजकी अधिकार्यांनी सगळ्यांची भलायकी सुदारता अशें ह्या वेळार स्पश्ट केलें.
ह्या अपघाताची म्हायती वाळपय पुलीस स्टेशनाक मेळटांच अधिकार्यांनी घडणुके सुवातेर येवन पंचनामो केलो. हे विशीं फुडली चवकशी पुलीस निरीक्षक राहुल नायक हांच्या फुडारपणा खाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
