भांगरभूंय | प्रतिनिधी
पेडणें, प्रतिनिधी : चोपडेंच्या दोंगरार नगर नियोजन खात्यान केल्ल्या बेकायदेशीर जमीन रूपांतराक विरोध करपा खातीर एकठांय आयिल्ल्या चोपडें पंचांतीच्या नागरिकांक थळावे आमदार जीत आरोलकार हांणी फाटबळ दिलें. हांगच्या दोंगरार नगर नियोजन खात्यान सर्वे नंबर १७/१ त २ लाख ६४ हजार १९७ चोरस मिटर जमिनी मदल्या १ लाख ९२ हजार ९५५ (६३ टक्के) जाल्यार सर्वे नंबर १०-१ ए मदल्या ३ लाख ७ हजार चौरस मिटर जमिनींत १ लाख ९२ हजार ४९६ मीटर (६३टक्के ) जमनीचें रूपांतर केलां. हांगा व्हडा प्रमाणांत अपार्टमेंट्स उबारतले. हाचो वायट परिणाम चोपडें आनी आगरवाडो गांवाचेर जावपाचो आसा. तशेंच हाचो वायट परिणाम थळाव्यांचेर जावपाचो आसा. हातूंत थळाव्या आमदारान लक्ष घालपाची मागणी केल्ली. ते प्रमाण शेनवारा आमदार जीत आरोलकार हे पंचायतींत हाजीर रावन पंचायत मंडळ नागरिकांच्यो समस्या समस्या आयकून घेतल्यो. ह्या वेळार नागरीक व्हडा संख्येन हजर आशिल्ले. आमदारान ह्या वेळार सांगलें, नगर नियोजन खात्यान थळावी पंचायत आनी नागरिकांक विस्वासांत घेनासतना व्हडा प्रमाणांत केल्ली जमीन रूपांतर फाटीं घे मेरेन थळाव्या पंचायतीच्या लढ्याक सहकार्य करतले अशें सांगलें. तशेंच हो प्रस्न विधानसभेत हाजीर करतलों. जमीन रूपांतर फाटीं घेसर नगर नियोजन खातें तशेंच संबंदीत यंत्रणे कडेन फाटपुरवण करतले. थंयूय येस मेळूंक ना जाल्यार आगरवाडो चोपडें पंचायतीन जाहीर केल्ले प्रमाण पंचायत जर हें प्रकरण उच्च न्यायालयांत व्हरता जाल्यार ताचो खर्च आपूण करतलों अशें स्पश्ट आस्वासन आमदार जीत आरोलकार हांणी आगरवाडो चोपडेंच्या नागरिकांक दिलें.
ह्या वेळार नागरिकांनी हो लढो खर करपा खातीर प्रसंगी न्यायालयांत वचपाचें थारायलां. वांगडा नगर नियोजन खात्याच्या ह्या अन्यायी आनी बेकायदेशीर निर्णया आडचो लढो खर करपा खातीर चोपडें शिवोले पूल बंद करपाचे शिटकावणेकूय आमदार आरोलकार हांणी फाटबळ उक्तायलां. आपूण जमीन रुपांतर प्रकरणांत थळाव्यां वांगडां रावतलों अशें तांणी ठामपणान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
