भांगरभूंय | प्रतिनिधी
भूंय संपादन पुराय करून दर म्हयन्याक अहवाल दिवपाचो आदेश
पणजी, प्रतिनिधी : चोडण ते साल्वादोर द मुंद ह्या 200 मीटर लांबायेच्या पुलाच्या कामाक बेगीनूच सुरवात जातली. भूंय संपादनाची प्रक्रिया बेगोबेग पुराय करून हेर सोपस्कार करपाचे आदेश मुख्यमंत्री डॉ. प्रमोद सावंत हांणी दिल्यात. पुलाच्या कामाचो दर म्हयन्याक अहवाल सादर करपाचे आदेशूय मुख्यमंत्र्यांनी बसकेंत दिले.
ह्या पुला खातीर 250 कोटी रूपयांचो खर्च येतलो. 2023 – 24 च्या अर्थसंकल्पात ह्या पुला खातीर 250 कोटींची तजवीज केल्ली. पुला खातीर भूंय संपादनाची प्रक्रिया निमणे पावंड्यार पावल्या. ती जाले उपरांत निविदा जारी जातली, अशी म्हायती बांधकाम अधिकाऱ्यांनी दिली. हो पुल चोडण, मये, नार्वे सयत दिवचलच्या लोकां खातीरुय फायद्याचो थारतलो. पुल नाशिल्ल्यान चोडण, मये, नार्वेंच्या लोकांक फेरीबोटीचेर निंबून रावचें पडटा. फेरीबोटीक लागून चोडण, मयेंच्या लोकांक पणजे पावपाक उशीर जाता. हाका लागून ह्या पुलाची फाटपुरवण मेयेचे आमदार प्रेमेंद शेट सेगीत करीत आसात.
शुक्रारा मुख्यमंत्री डॉ. सावंत हांणी चोडण पुला विशीं बसका घेतली. मयेंचे आमदार प्रेमेंद शेट, पर्यटन मंत्री तशेच पर्वरीचे आमदार रोहन खंवटे, भौशिक बांधकाम खात्याचे मुखेल अभियंते, उत्तर गोंय जिल्होधिकारी तशेच हेर अधिकारी हाजीर आशिल्ले.
मेळिल्ल्या म्हायती प्रमाण, जमनीच्या धनयांक लुकसाण भरपाय दिवपा खातीर सरकारान ईडीसी कडेन 12.5 कोटींची रक्कम जमा केल्या. हातुंतल्यान जमनीच्या धनयांक कायद्या प्रमाण लुकसाण भरपाय दिवची. तशेच साल्वादोर द मुंद वाठारांतले रस्ते पुलाक जोडपी रस्त्या सयत रूंद करचे पडटलें. पुलाचें काम जीएसआयडीसी मार्फत जातलें, अशी म्हायती अधिकाऱ्यांनी दिली.
चोडण पुलासंबंधी कामाची अधिकाऱ्यांवेली जापसालदारी निश्चित केल्या. भूंय संपादन प्रक्रिया जाले उपरांत जीएसआयडीसी प्रकल्पाचो आराखडो तयार जातलो. पुलाचे काम जीएसआयडीसी करतलें जाल्यार रस्त्यांची कामां बांधकाम खात्याक करची पडटलीं.
पर्यटन मंत्री, पर्वरी आमदार रोहन खंवटे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
