भांगरभूंय | प्रतिनिधी
बायलेक घुस्पटून मरण, दोन जखमी
दोनूय जखमींची भलायकी स्थीर
शॉर्ट सर्किटाक लागून घडली दुर्घटणा
भांगरभूंय । प्रतिनिधी
पणजी : चोडणेंच्या खैराटवाडो वाठारांत शेनवारा फांतोडेर एका घरांतल्या इन्व्हर्टराचो शॉर्ट सर्किटाक लागून स्फोट जालो आनी घराक उजो लागलो. हे दुर्घटणेंत घुस्पटून एके 55 वर्सां पिरायेचे बायलेक मरण आयलें. धुंवराक लागून बेशुद्ध पडिल्ल्या तिच्या दोन भुरग्यांचेर बांबोळे जीएमसींत उपचार चालू आसात. ह्या उज्यांत वळवयकार हांच्या घराचें सुमार 5 लाखांचें लुकसाण जालें.
मेळिल्ले म्हायती प्रमाण, ही दुर्घटणा शेनवारा फांतोडेर 6.10 वरांच्या सुमाराक घडली. घडणुके वेळार सपना वळवयकार (55) आनी ताचीं दोन भुरगीं समृद्धी वळवयकार (24) आनी साईतेज वळवयकार (17) सुस्त न्हिदेंत आशिल्लीं. अचकीत घरांतल्या इन्व्हर्टराचो शॉर्ट सर्किटाक लागून व्हड स्फोट जालो आनी कांय वेळांतूच उज्यान पेट घेतलो. पुराय घर घुंवरांत भरलें आनी न्हिदेंत आशिल्ल्यान कोणाकूच भायर सरपाची संद मेळूंक ना. धुंवर फुफ्फुसांत गेल्ल्यान दोनूय भुरगीं घरांतूच बेशुद्ध जावन पडलीं.
घराक उजो लागला तें पळोवन वाठारांतल्या लोकांनी तत्काळ धांव घेवन मजत वावर सुरू केलो आनी पुलिसां सयत उजो पालोवपी दळाक आपयलो. दिवचल उजो पालोवपी दळाचे अधिकारी शिवाजी नायक हांच्या फुडारपणा खाला पंगडान घडणुकेचे सुवातेर धांव घेतली आनी उज्याचेर नियंत्रण मेळयलें. मात, ते मेरेन सपना वळवयकार हिका मरण आयिल्लें. बेशुद्ध अवस्थेंत आशिल्ल्या गंभीर जखमी जाल्ल्या दोनूय भुरग्यांक ताकतिकेन उपचारा खातीर जीएमसींत व्हेलीं. सध्या तांचेर अतिदक्षता विभागांत उपचार चालू आसात आनी तांची भलायकी स्थीर आसा.
पोरणें गोंय पुलीस स्टेशनाची उपनिरिक्षक लॉरेन्स सिक्वेरा पुराय प्रकरणाचो खोलायेन तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
