भांगरभूंय | प्रतिनिधी
सध्याचो वस्ताद चेन्नय सुपरकिंग्सान इंडीयन प्रिमीयर लिगेंत (आयपीएल) सेगीत दुसऱ्या जैताची नोंद केली. चेपॉक स्टेडियमाचेर जाल्ले मॅचींत ताणें गुजरात टायटन्साक 63 धांवड्यांनी हारयलो. ह्या जैता सयत चेन्नय सुपरकिंग्स चार गुणां सयत गुणतकट्यांत पयले सुवातेर पावलो. उक्तावणाचे मॅचींत ताणें रॉयल चॅलेंजर्स बंगळुरूक हारोवन जैताचें खातें उगडिल्लें.
चेन्नय सुपरकिंग्सान दिल्ले 207 धांवड्यांचे मोखीचो फाटलाव करतना गुजरात टायटन्साक 20 ओव्हरींनी 8 विकेटी वगडावन 143 धांवड्यो करप शक्य जाल्यो. गुजराताच्या एकाय बॅट्समनाक व्हड खेळी करपाक जमली ना. सगल्यांत चड साई सुदर्शनान 37 धांवड्यांची खेळी केली.
चेन्नय सपरकिंग्सा वतीन दीपक चाहर, मुस्थफिजुर रहमान, तुषार देशपांडे हाणें दरेकी 2 विकेटी घेतल्यो. डॅरल मिचेल आनी मथिशा पथिरण हांकां एकेक विकेट फावो जाली.
ते पयलीं ओपनर रचीन रवींद्र आनी मुखेली ऋतुराज गायकवाड हांणी करून दिल्ले बरे सुरवाती उपरांत मदले फळयेंत शिवम दुबेन केल्ले आक्रमक बॅटिंगेच्या नेटार चेन्नय सुपरकिंग्सान धांवड्यांचो दोंगर उबारलो. ताणें निर्धारीत 20 ओव्हरींनी 6 विकेटी वगडावन 206 धांवड्यो केल्यो.
रचीन रवींद्र आनी ऋतुराज गायकवाड हांणी दरेकी 46 धांवड्यो केल्यो जाल्यार शिवम दुबेन 23 बॉलांनी 51 धांवड्यांची वादळी खेळी केली.
गुजरात टायटन्सान टॉस जिखून पयलीं चेन्नय सुपरकिंग्साक बॅटिंगेचें आक्रमण दिल्या उपरांत गायकवाड आनी रचीन हांणी आक्रमक सुरवात करून दिली. दोगांयनी फकत 27 बॉलांनी चेन्नयचो अर्द शेंकडो पुर्ण केलो. सुरवातीच्या कांय ओव्हरींनी गायकवड हाच्या परस रचीनान चड आक्रमक बॅटींग केली. तो रोखडोच आपलो अर्द शेंकडो पुर्ण करतलो अशें दिशिल्लें. पूण, राशीद खानाच्या स्पिन बॉलाचेर वृद्धिमान साहान फिशायकायेन फिल्डींग करीत ताची खेळी सोंपयली. रचीनान 20 बॉलांनी स चवके आनी तीन सक्यांचे मजतीन 46 धांवड्यो केल्यो.
रचीन बाद जाल्या उपरांत मुखेली गायकवाड हाणें अजिंक्य रहाणे वांगडा मेळून डाव मुखार व्हरपाची जापसालदारकी सांबाळ्ळी. गायकवाडान आक्रमक बॅटींग करून फकत 9.5 ओव्हरींनी चेन्नयचो स्कोर शंबरा वयर पावयलो. पूण, ही जोडी व्हड भागिदारी करतली अशें दिसता आसतना साहान परतून एकदा फिशालकायेन रहाणेक (12) साई किशोराचे बॉलिंगेचेर स्टम्ब बाद केलो. ते उपरांत दुसरी बाजू सांबाळपी गायकवाड 46 धांवड्यो करून स्पेंसरचे बॉलिंगेचेर बाद जालो.
ओपनरांनी बरी सुरवात करून दिल्ल्यान फुडल्या ओव्हरींनी शिवम दुबे आनी डॅरेल मिचेल हांकां धांव गती राखपाक येस आयलें. 15वे ओव्हरींत दोगांयनी पंगडाचो स्कोर 150च्या वयर पावयलो. आक्रमक बॅटींग करपी दुबेन 5 सके आनी दोन चवक्यांचे मजतीन 22 बॉलांनी 51 धांवड्यो केल्यो.
ते उपरांत समीर रिझवी (14), डॅरेल मिचेल (24) आनी रवींद्र जडेजा (7) हांणी केल्ले बॅटिंगे नेटार चेन्नयन दोनश्यांचो आंकडो हुपलो.
गुजराता वतीन राशीद खानान दोन जाल्यार मोहीत शर्मा, साई किशोर आनी स्पेंसर हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
