चेन्नय सुपरकिंग्साची जैतान सुरवात

भांगरभूंय | प्रतिनिधी

सध्याचो वस्ताद चेन्नय सुपरकिंग्सान अंदूंच्या इंडीयन प्रिमीयर लिगेक जैतान सुरवात केली. हांगाच्या एमए चिदंबरम स्टेडियाचेर जाल्ले उक्तावणाचे मॅचींत ताणें रॉयल चॅलेंजर्स बंगळुरूक 6 विकेटींनी हारयलो. घरच्या मैदानाचेर खेळपी चेन्नय सुपरकिंग्सान दर खेपे बंगळुरूचें आपलो शेक दवरला.

रॉयल चॅलेंजर्स बंगळुरून दिल्ली 174 धांवड्यांची मोख चेन्नय सुपरकिंग्सान 18.4 ओव्हरींनी 4 बाद मेळयली.

मुखेली ऋतुराज गायकवाड (15), रचीन रवींद्र (37), अजिंक्य रहाणे (27), डॅरेल मिचेल (22), शिवम दुबे (नाबाद 34), रवींद्र जडेजा (नाबाद 25) मोख येसस्वी रितीन मेळोवपाक हातभार लायलो.

ते पयलीं, मुस्तफिजुर रहमानाची घातक बॉलीग, दीपक चाहरान उत्कृश्ट बॉलाचेर कॅमरून ग्रिनाक केल्लो बोल्ड आनी अजिंक्य रहाणेची जबरदस्त कॅच अशा म्हत्वाच्या खिणांक लागून उक्तावणाचे मॅचींत येजमान चेन्नय सुपरकिंग्साची सुरवात बरी जाली जावंक नासली तरी आपलो शेक तयार केलो. पूण, अखेरच्या कांय ओव्हरींनी दिनेश कार्तिक आनी अनुज रावत हांचे बॅटिंगेंक लागून रॉयल चॅलेंजर्स बंगळुरून सन्मानजनक धांवसंख्या उबारपाक येस मेळयलें.  

टॉस जिखून पयलीं बॅटींग करपी रॉयल चॅलेंजर्स बंगळुरूक मुखेली फाफ ड्युप्लेसिसान आक्रमक सुरवात करून दिली.

बंगळुरूची गाडी वेगान धांवत आसतना मुस्तफिजुर रहमानान गाडयेक ब्रेक लायलो. डावाचे 41 धांवड्यांचेर बंगळुरून ड्युप्लेसिसाच्या रुपान पयली विकेट वगडायली. ते उपरांत तेच ओव्हरींत रजत पाटीदार शुन्याचेर बाद जालो. ते उपरांत दीपक चाहरान ग्लॅन मॅक्सवॅलाक आनी मुस्तफिजुरान कॅमरून ग्रिनाक आपल्या जाळांत घुस्पायलो.

कोहलीन सावकाश बॅटींग करून डाव सांबाळपाचो यत्न केलो. पूण, ताचे वांटेंत अजिंक्य रहाणे आयलो. मुस्तफिजुराचे बॉलिंगेचेर व्हड शॉर्ट खेळपाच्या यत्नांत आशिल्ल्या कोहलीची शिमे लागसार रहाणेन उत्कृश्ट कॅच धरली. ताका रचीन रवींद्रान कॅच धरपाक मजत केली.

कोहलीन 20 बॉलांनी 21 धांवड्यो केल्यो. रॉयल चॅलेंजर्स बंगळुरून निर्धारीत 20 ओव्हरींनी 6 विकेटी वगडावन 173 धांवड्यो केल्यो.

मजगतीं, संकश्टांत आसतना दिनेश कार्तिकान आपल्या अणभवाचो फायदो घेत संयमी खेळी केली. ताका अनुज रावतान मोलादीक साथ दिली. कार्तिकान नाबाद 38 धांवड्यो केल्यो, जाल्यार अनुजान 48 धांवड्यांचें योगदान दिलें.

11.4 ओव्हरी मेरेन बंगळुरूची धांवसंख्या 5 बाद 78 अशी आशिल्ली. पंगड संकश्टांत आसतना कार्तिक-अनुज हे जोडयेन डाव मुखार व्हेलो. दोगांयनी 50 बॉलांनी 95 धांवड्यो केल्यो. चेन्नय वतीन मुस्तफिजुरान सगल्यांत चड 4 विकेटी घेतल्यो.