चेन्नय मुखार गुजराताचें आव्हान

भांगरभूंय | प्रतिनिधी

चेन्नय सुपरकिंग्स आनी गुजरात टायटन्स ह्या पंगडां मदीं फायनल जातली. मजेशीर गजाल म्हणल्यार इंडियन प्रिमीयर लिगेच्या (आयपीएल) 16व्या हंगामाची सुरवात जंय जाल्ली थंयच 59 दिसां उपरांत सर्त सोंपतली. तेच पंगड आनी तेच मुखेली.

अंदूंच्या हंगामाच्या उक्तावणाची मॅच चेन्नय सुपरकिंग्स आनी गुजरात टायटन्स ह्या पंगडां मदीं जाल्ली. आनी फायनल लेगीत ह्या पंगडां मदीं जाता. ह्या पंगडां मदीं क्वॉलिफायर एक मॅच जाल्ली.

फायनल सुरू जावचे पयलीं रंगरंगाळ्या कार्यावळी वरवीं समारोप सुवाळो जातलो.

चेन्नय सुपरकिंग्स आपलो मुखेली महेंद्रसिंग धोनी खातीर जिखपाक सोदतलो. घडये धोनीची ही निमाणी मॅच आसुये. धोनी अंदूंच्या हंगामांत चडशे खेपे आठवे सुवातेर बॅटींग करपाक आयला. पूण, तुषार देशपांडे सारको अणभव नाशिल्लो बॉलर आनी शिवम दुबे सारक्या युवा बॅट्समनांचो ताणें आत्मविस्वास वाडयला.

दुसरे वटेन गुजरात टायटन्सा कडेन लेगीत इतिहास घडोवपाची संद आसा. मोहम्मद शमी (28 विकेटी), राशिद खान (27 विकेटी) आनी मोहित शर्मा (24 विकेटी) ह्या बॉलरांनी आपलें काम योग्य रितीन सांबाळ्ळां. बॅटिंगेंत शुभमन गिला खेरीत मुखेली हार्दिक पांड्यान 325 धांवड्यो केल्यात.

चेन्नय सुपरकिंग्सा वतीन डॅव्हॉन कॉन्वे (625 धांवड्यो), ऋतुराज गायकवाड (564 धांवड्यो) आनी अजिंक्य रहाणे (299 धांवड्यो) हांणी धांवड्यांचो पावस घाला.

दोनूय पंगडांचो हेड टू हेड रॅकॉर्ड पळयलो जाल्यार गुजराताचें दालें जड दिसता. ह्या पंगडां मदीं अजून मेरेन फकत चार मॅची जाल्यात. हातूंतल्यो तीन मॅची गुजरातान जिखल्यात, जाल्यार एक मॅच चेन्नय सुपरकिंग्सान जिखल्या.

नरेंद्र मोदी स्टेडियमाच्या खेळपट्टी विशीं सांगचें जाल्यार हांगा धांवड्यांचो पावस पडटा. सुरवातीक फास्ट बॉलरांक बॉलिंगेंत मुव्हमॅण्ट मेळपाक शकता. पूण, उपरांत बॅट्समन आपलो शेक दवरतात. बावण्ड्री ल्हान आसा आनी आवट फिल्ड फास्ट आसा. रातच्या वेळार दंव पडपाक सुरवात जाता लागून जो पंगड टॉस जिखतलो तो पयलीं बॉलिंंग करपाक शकता.