भांगरभूंय | प्रतिनिधी
चेपॉक मैदानाचेर येजमान चेन्नय सुपर किंग्स आनी रॉयल चॅलेंजर्स बंगळुरू हांचे मदले मॅची वरवीं इंडियन प्रिमियर लिगेच्या अंदूंच्या हंगामाक सुरवात जाता. बंगळुरू खातीर चेपॉक मैदानाचेर जैत जोडप कठीण जालां. हे खेपे बायलांच्या रॉयल चॅलेंजर्स बंगळुरू कडल्यान उर्बा घेवन दादल्यां पंगड जैतान आयपीएलाक सुरवात करपाक शकतलो काय असो प्रस्न ताच्या चाहत्यांक पडला.
चेन्नय आनी बंगळुरू दोनूय पंगडांक कडेन येसस्वी जोडी आशिल्ली. हे खेपे मात डॅवन कॉन्वे नाशिल्ल्यान चेन्नयची जोडी फुटली. हे खेपे ऋतुराज गायकवाडा वांगडा रचिन रवींद्र डावाची सुरवात करपाक शकता. दुसरे वटेन बंगळुरू कडेन 2021 सावन येसस्वी जोडी लिगेंतली येसस्वी जोडी कायम आसा. फाफ ड्युप्लेसी आनी विराट कोहली ह्या हंगामांत लेगीत आक्रमक सुरवात करपाक इस्तूक आसतले.
कॉन्वे आनी गायकवाड हे जोडयेन 54.9 चे सरासरीन आनी 9.02चे रन रेटीन 2021त सगल्यांत चड 1208 धांवड्यो केल्ल्यो. जाल्यार दुसरे सुवातेर कोहली-ड्युप्लेसी जोडी आशिल्ली. हे जोडयेन 53.8चे सरासरीन आनी 8.51चे रन रेटीन 1183 धांवड्यो केल्ल्यो.
आयपीएलांत बंगळुरूचें बाबत रॅकॉर्ड खंयच्या पंगडा आड आसा जाल्यार तो चेन्नय आड आसा. 2020 सावन बंगळुरून चेन्नय आड सातातल्यो पांच मॅची वगडायल्यात. फाटल्या स मॅचींतल्यो पांच मॅची हारला. फाटल्या 10 वर्सांच्या रॅकॉर्डाचेर नदर मारली जाल्यार चेन्नय सुपर किंग्सान बंगळुरू आड 15तल्यो 11 मॅची जिखला.
चेन्नयचो घरच्या मैदाना वयलो रॅकॉर्ड उत्कृश्ट
चेन्नय सुपरकिंग्साचो घरच्या मैदाना वयलो सगल्या पंगडा परस उत्कृश्ट आसा. बंगळुरू आडचो रॅकॉर्ड उंचेल्या पांवड्यार पावता. बंगळुरू आडच्यो आठातल्यो सात मॅची जिखल्यात. चेन्नय चेपॉक मैदानाचेर 64 मॅची खेळ्ळा. हातूंतल्यो 45 मॅची जिखल्यात, जाल्यार 19 मॅचींनी हार घेवची पडल्या. अशे तरेन चेन्नयच्या जैताची टक्केवारी 70 इतकी जाता.
डॅथ ओव्हरी बंगळुरूची समस्या
रॉयल चॅलेंजर्स बंगळुरूची बॅटींग फळी उत्कृश्ट आसा. फाटल्या हंगामांत 76 टक्के धांवड्यो सुरवातीच्या चार बॅट्समनांनी केल्ल्यो. हातूंत 22 अर्द शेंकड्यांचो आस्पाव आशिल्लो. हेर पंगडांनी मारिल्ल्या अर्द शेंकड्या परस चड आसा. टॉप चार बॅट्समन धांवड्यांचो पावस घालतात, ताका लागून पावर प्लेंत आनी मदले फळयेंत चड धांवड्यो केल्यात. पूण, डॅथ ओव्हरींनी बंगळुरूक धांवड्यांची गती राखपाक जमना. डॅथ ओव्हरींनी 9.66 धांवड्यो प्रती ओव्हरीन केल्यात.
चेन्नय सुपर किंग्साचे बॅट्समन स्पिनरां आड उत्कृश्ट रितीन खेळटात. फाटल्या हंगामांत ताच्या बॅट्समनांनी स्पिनरां आड सगल्यांत चड धांवड्यो केल्ल्यो. सुरवातीचे आनी मदले फळयेंत कॉन्वे, गायकवाड, दुबे आनी अजिंक्य रहाणे हांणी धांवड्यो केल्ल्यो. तांणी 8.45चे सरासरीन धांवड्यो केल्ल्यो, हे खेपे डॅरिल मिचेल आनी समीर रिजवी आसा. दोगूय स्पिनरांक बेस तरेन खेळटात. दुसरे वटेन बंगळुरुचे स्पिनर फाटल्या हंगामांत म्हारगे थारिल्ले. तांणी 9.66 धांवड्यो प्रती ओव्हर दिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
