भांगरभूंय | प्रतिनिधी
भावंडांनो,
जायते खेपे हांवें अणभवलां एखादो भुरगो आपल्या कामांत, खेळांत वा अभ्यासांत जर अपेशी थारलो, जैत जोडूंक पावलो ना जाल्यार तो तेच गजालींत इतलो खचून वा चेपून वता की तो परतून ते गजालींत यत्न करपाक वचना. खंयच्या कारणान आपणाक अपेस आयलें हाचेर तो बारकायेन विचार करिना. भावंडानो, दरेक भुरग्यान आपणाल्या अपेसाचेर विचार करूंकच जाय. आपणा कडेन जाल्ल्यो चुको सुदारून परतून येस मेळोवपाक यत्न करूंकच जाय. तें मळ सोडून दिवंक उपकारना. तुमकां सांगतां, दुसरे खेपेक तुमच्या यत्नाक येस, जैत मेळटलेंच मेळटलें.
भावंडानो, आनीक एक गजाल सांगतां. आपणाक कोणूय दुसरो पालव दितलो आनी मागीरच हांव म्हजें काम पुराय करतलों अशे तरेचो समजूय भुरग्यान केन्नाय बाळगुचो न्हय. आमी आमचें काम पुराय करपाक दुसऱ्याच्या आदाराक रावत जाल्यार चडशी आमच्या वांट्याक निर्शेणीच येतली. तातूंत जैत मेळपाची आस्त साप्प उणी आसता. आमी दुसऱ्याच्या आदाराची वाट पळयली जाल्यार नकळटां आमच्यांत आळशीपणा बळावतात. दुसऱ्यांचो केन्नाच भरवंसो नासता. कारण ताका दुसऱ्यांच्या कामाचें व्हडलेशें पडिल्लें नासता. देखून जाण्ट्यानीं लेगीत म्हळां की, “जो दुसऱ्यावरी विसंबला त्याचा कार्य़भाग बुडाला”. दुसऱ्याचेंर केन्नाच भरवंसो दवरून आपलें आदण दवरचें न्हय.
भावंडांनो, आपलें काम आपणेंच करचें मागीर तातूंत चुको घडूं. चुको घडल्यार मुखार त्यो सुदारूंक येतात. आनी तातूंतल्यानूच आपली खरी उदरगत घडून येता.
भावंडांनो, अभ्यासाचेंय अशेंच आसता. कांय भावंडा दुसऱ्यांकडल्यान आपलो अभ्यास करून घेतात. पुणून तांकां परिक्षेंत येस मेळना. अभ्यासांत तुमकां मुखार सरपाचें आसता देखून तुमचो अभ्यास तुमीच करात.. चुकल्यार चूकूं. चुकता अशें दिसल्यार दुसऱ्यांक विचारात पुणून दुसऱ्यांकडल्यान करून घेवं नाकात. एकदां केल्ली चूक परतून करूं नाकात. चुको घडून येवच्यो न्हय हे खातीर शिक्षकांचें मार्गदर्शन नेमान घेयात. नमळायेन तांच्या कडल्यान गिन्यान मेळयत रावात.
भावंडांनो, तुमचे आदरणीय शिक्षक हेच तुमच्या सुगूर जिविताचे दिवे आसात. त्या दिव्यांच्या उजवाडांत तुमी तुमचें जिवीत पर्जळीत उजवाडाचें करून घेयात. कळटा न्हय म्हजी सांगणी? भावंडांनो, त्याच उजवाडाचेर तुमी तुमच्या घरांत उजवाड फांकचो आसा, त्याच उजवाडांत पुराय घरच्यांक सुखी दवरपाचें आसा, ते खातीर शिकवणेंत नम्र रावात…
भावंडांनो, फाल्यां सावन धावेची परीक्षा सुरू जाता. ही परीक्षा दितल्या सगळ्यांक हांव काळजाथावन परबीं दितां, सगल्यांक बरी भलायकी आवंडेतां. आनी मागतां हे परिक्षेंत तुमकां तुमच्या कश्टांचें मोल मेळून तुमकां घसघशीत दोळे दिपकावपी येस मेळूं…
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
