भांगरभूंय | प्रतिनिधी
आदल्या तेंपार गोंयांत चिमणी (स्पॅरो) नांवाचें सुकणें सगले कडेन दिसतालें. मात आतां गुदांव सोडल्यार तें सहसा पळोवपाक मेळना. कालूच संवसारीक
चिमणी दीस (20 मार्च) जालो. चिमणी आनी तिची राखण करपा खातीर तो मनयतात. चिमणींचो नेटान उणो जायत वचपी आंकडो मतींत घेवन 20 मार्च हो दीस संवसारीक पांवड्याचेर मनयतात. फुडले पिळगेक चिमणे विशीं म्हायती मेळची होय दीस मनोवपा फाटलो हेतू.
भारतांतलें सगळ्यांत वळखीचें सुकणें म्हणून चिमणेक कांवळ्या फाटोफाट वळखतात. आदीं गल्ली, बाल्कनी, टेरेस, झाडां आनी मनशाच्या वसणुकांनी मुक्तपणान भोंवपी चिमणी आयज ना जाल्या. हेर जनावरां भशेन चिमणींच्या अस्तित्वाकय धोको निर्माण जाता. स म्हयन्यांनी एक फावट दोन ते चार तांतयां घालपी चिमणींक मिलनाच्या हंगामांत मातयेची गरज आसता. पूण, मातयेची सुवात आतां शिमिटान घेतल्या. शिमिटाचें रान आनी वाडत वचपी रानां कापपाक लागून चिमणेचें रावपाचें थळ नश्ट जालां. वाडत वचपी शारीकरणाक लागून चिमणेंचो आंकडो नेटान उणो जायत आसा. खासा करून शारांतल्या मोबायल टाॅवरांतल्यान येवपी विद्युत चुंबकीय उत्सर्जन, आर्विल्ल्या घर बांदपाचे पद्दतीक लागून घोंटेर करपाच्यो सुवाती मेळनाशिल्ल्यान, अन्नधान्याची उपलब्धताय, शेतांत सारें आनी कीटकनाशकां वापरतात, शारांनी वाडत वचपी प्रदुशण आनी रसायनांचो वापर अशा जायत्या कारणांक लागून चिमणींचो आंकडो उणो जायत आसा.
चिमणेंचे संख्ये विशीं लोकां मदीं जागृताय निर्माण करपा खातीर 20 मार्च मनयतात. चिमणेचो उणो जायत वचपी आंकडो असोच चालू उरलो जाल्यार फुडल्या पिळग्यांक फकत चित्रां वरवीं चिमणी पळोवंक मेळटले. सुकणीं हो मनशाच्या जिविताचो एक अभिन्न भाग. सकाळीं आमकां जाग हाडपी कोकिळा सावन चिमणेंच्या चिवचिवाटा मेरेन सगळीं सुकणीं आमचो दीस सुखद करपाक आमच्या कानांत आनी मनांत एक म्होंवाळ सुर वाजयतात.
पाचवीं झाडां पळोवन मन जशें खोशी जाता तशेंच सुकण्यां खातीरुय मन खोशी जाता. सुकण्यांचें अस्तित्व तिगोवन दवरप म्हत्वाचें. ते खातीर दरेकल्यान आपल्या घराच्या टेरेसाचेर, बाल्कनीचेर, पांख्यांचेर कृत्रीम घरटें दवरचें. तातूंत ज्वारी, बाजरी, गंव हे सारकिल्लीं कड्डणां दवरचीं. बाल्कनी, गॅलरींत मातयेच्या आयदनांत उदक दवरल्यार तें चिमणेक पियेवपाक मेळटलें आनी गिमांत तांकां त्रास जावचो ना. फकत ‘चिमणी दीस’ मनोवन चिमणी परत येवची नात, हेंय आमी मतींत दवरपाक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
