भांगरभूंय | प्रतिनिधी
पावस लागीं पावलो म्हणजे गडगड मारता. आपूण येतां म्हणपाची सुलूस तो दिता. मदींच बेबकांचें गायन सुरू जाता. वेंचणुकांचो पावस लागीं पावलो म्हणजेय असोच गडगड मारूंक लागता आनी बेबकां डरांव डरांव करूंक लागतात. सद्याक बेबकां अकड्डूंक लागल्यांत. खंय खंय तांचे मोर्चा दिसूंक लागल्यात. कोण भावना दुखावल्यो म्हणून पुलिशेंत कागाळी करतात तर कोण बेकायदेशीर कामांचेर बोटां दाखयतात. इतलो तेंप सगले शेंसुस्त आसले. आतां अकस्मात सगल्यांक जाग येवंक लागल्या. मागीर कोण धर्माचेर उलयतात तर कोण भाशेचेर उलोवंक लागल्यात. तातूंत अजून जाय तसो पावसूय पडना. नासल्यार तकलेक मात तरी थंडसाण मेळपाची. एकेवटेन हो गडगड तट्टट आयकूंक येता तर दुसरे वटेन कोणकोण आपणाले वाडदीस नेटान मनयतात. फाटलीं चार वर्सां तांकां आपणाल्या वाडदिसाची यादूच नासली काय दिसता.
वेंचणूक लागीं पावता तशे खंय जायते पत्रकार निर्माण जातात अशें मुख्यमंत्री म्हणटात. कितलें खरें तें तांकांच चड खबर आसतलें. पूण वेंचणूक लागीं पावता तेन्ना समाजसेवक मात भरपूर तयार जातात म्हणपाचें मानून घेवचेंच पडटलें. मागीर कोण खळयो निवळ करतात तर कोण गरिबांचीं घरां मदेरार करतात. कोण रेनकोट आनी सत्र्यो वांट्टात तर कोण भुरग्यांक दप्तरां दिवन ताचे फोटू मारतात. कांय जाण आनीक कांयच नासल्यार आपणाले वाडदीस मनोवन लोकांक एक जेवण तरी घालतात. आनी वाड्यावाड्याचेर पोस्टरां लायतात. तशेंच वर्तमानपत्रांचेर आपणें केल्ल्या कामांची व्हडली जायरात दितात. तांचे नदरेन समाजसेवा म्हणटा ती हीच. बाकीचे दीस ते खंय आसतात आनी कितें करतात तें कोणाक खबर आसना.
विरोधकूय अकस्मात जागे जावन आपूण आसात म्हणपाचें दाखयतात आनी कसले तरी विशय घेवन सरकाराक जाप विचारतात. सरकारूय ह्याच समयार जागें जाता. नव्यो नव्यो स्किमी घेवन लोकां मुखार येता. मंत्र्यांकूय कंठ फुट्टा. सरकार कितले बरे तरेन चल्लां आनी आपणाल्या खात्यान कितलें बरें काम केलां तें सांगपाक तांकां खोशी जाता. भायर लोक कितलेय बेजार जाल्ले आसूं सरकाराक ते खोशीच आसात काय दिसता. मागीर सरकारान फाटल्या वर्सांनी कितले हजार कोटी खर्च केले आनी जनतेक ताचो कसो फायदो जातलो हें आयकूंक मेळटा. सद्याक मुख्यमंत्र्यां कडल्यान तरी हेंच आयकूंक मेळटा.
फाटल्या कांय वर्सांत खंय मोदी सरकारान कितलेशेच कोटी गोंयचेर खर्च केले. कोटी कोटी उड्डाणांच्यो खबरी आयकतना हे कोटी गेले खंय तें मात कशेंच कळना. मोपा विमानतळाचेर वा रेल्वेचेर खर्च केलो जाल्यार ताचो सामान्य गोंयकाराक कितें फायदो तेंच कळना. हाचो फायदो जाता तो काँट्रेक्टराक आनी काँट्रेक्टर खंयचो? पळेयात विचार करून. म्हणजे हे पयशे खंय वतात? हाचो इल्लो तरी फायदो आमकां जाता? व्हडले व्हडले हायवे जातात पूण त्या हायवे वेल्यान वचूंक भायर सरिल्लो मनीस बरे तरेन घरा पावतलो काय ना हाची खात्री आसता? ना! दर दिसा रस्त्याचेर मरणां चुकच नात. गाडयो आनी स्कुटरीन वचपीच न्हय जाल्यार रस्त्यान चलत वचपी लेगीत वेवस्थीत पावतलो म्हणून सांगूक जावचें ना. आनी हाचेर कसलेच उपाय घेतिल्ले दिसनात. फक्त बेल्ट घालोना वा हॅल्मेट घालें ना म्हणून दंड घालो म्हणजे जालें? दंड फारीक केल्यार अपघात चुकतलो?
हे अपघात, हीं मरणां वाचोवंक कितें उपाय घेतात? जे कोटी कोटी मोडटात तांतले कितले कोटी हे अपघात आडोवंक वापरल्यात? सरकारान हाचेर विचार तरी केला?
सद्याक वीज खात्या आड लोक बोवाळ घालतात. जांकां खंय सातशें आठशें रुपया बील येतालें तांकां चार-पांच हजार बील येवंक लागलां. वीज खातें सदांच लुकसाणेंत चलता म्हणपाचें आयकूंक येता. आनी तें लुकसाण भरून काडूंक वीज मंत्री नव्यो नव्यो युक्ती सोदीत आसता. खंयचो स्मार्ट मिटर तर खंयचो वाडिल्लो लोड. सगलो लुकसाणेचो लोड सामान्यांच्या माथ्यार मारपाचो. स्मार्ट मिटर आसूं वा आनीक खंयचेंय नवें काम, तें गरजेचें हातूंत दुबाव ना. कमिशन मेळटा न्हय तें कशें चुकोवंक जातलें?
वेंचणूक लागीं पावल्या म्हणटकूच थंय खर्च करूंक नाका? खंयच्यान हाडटले ते? म्हणटकूच नवीं टेंडरां गरजेचींच. पूण हें करतना सामान्यांक ताचो त्रास जावचो ना हाचें भान दवरूंक नाका? फाटलीं दोन वर्सां आमचे थंय वीज खातें जमनी पोंदच्यान केबली घालपाचें काम करता. हाका लागून रस्ते फोडटात. पूण ते परते सारके करूंक जाय हें वीज खात्याक खबर ना. एकदां फोडले कीं जालें. उरले मागीर ते तशेच. पडनात मागीर लोक त्या रस्त्यां वेल्यान. गाडयांची वाट लागली म्हणून वीज खात्याक कित्याक पडलां? तांच्या टेंडरांनी हे रस्ते परते सारके करूंक जाय म्हणपाचें इंजिनियरांक खबर आसना? तांच्या टेंडरान तशें बरयिल्लें आसना? काय वेंचणुकांच्या वेळार दुसरें खातें करतलें म्हणून आपल्या काँट्रेक्टराक ते सूट बी दितात? उरता तें वांटून खावंया अशें बी न्हय मूं? दुबाव मारता. वीज खात्यांत सिव्हील इंजिनियर आसूंक जाय काय दिसता. कितें करतात काय ते? ह्या कामांचेर लक्ष दितात काय ना?
आमच्या दवर्ली रस्त्याचे कशे हाल करून उडयल्यात तें मुद्दम मंत्र्यान येवन पळोवंक जाय. म्हाका तरी दिसता अंदूं वर्सा पर्यटन खात्यान हांगाच चिखोलकालो मनयल्यार बरें जातलें. नाय जाल्यार पावसांत ह्या रस्त्यां वेल्यान भोंवपी स्कुटरवाल्यांक निसरून पडुंकूच जाय. आनी वाटे वयल्यान चलत वचप्यांक चिखलान न्हांवकूंच जाय. म्हणटकूच हे स्मार्ट रस्ते पर्यटकांकूय पळोवंक मेळळ्यार बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
