भांगरभूंय | प्रतिनिधी
सांगें: गोंयचे पयले मुख्यमंत्री दयानंद बांदोडकार हांचे कारकिर्दींत सांगें बाजारांत टावन हॉल बांदिल्लो. तो टावन हॉल आतां मोडकुळेक आयलां. त्या टावन हॉलांत आपलो वेवसाय थाटिल्ल्या लोकांक पालिकेन थंय सावन दुसरी कडेन हालयलें. पूण चिकन विक्रेतो थंयच रावलो. मजगतीं, पालिका कर्मचारी, मामलेदार, उपजिल्होधिकारी पुलिसां सयत ही इमारत मातयेभरवण करपा खातीर यंत्रणा घेवन आयले तेन्ना उच्च न्यायालयाची स्टे ऑडर सादर केली आनी इमारत मोडपाक स्थगिती मेळयली.
सांगें बाजारांत आशिल्लो पोरणो टावन हॉल मोडकुळेक आयिल्ल्यान नुस्तें विक्रेत्यांक थंयच्यान हालयिल्लें. पूण थंयचो चिकन विक्रेतो आपल्याक दुकान मेळूंक नाशिल्ल्याचें निमित्त करून तेच सुवातेर रावलो.
फाटल्या वर्सा हॉल जर्जर जाल्ल्यान हॉलाचो एक भाग कोसळिल्लो तेन्ना त्या वेळार हॉल मोडून थंय नवो प्रॉजेक्ट येतलो अशें सांगतालें. तशेंच पोरूं अनिता फर्नांडीस ही बायल मोटार चलयत आसतना मोटारीचेर झाड पडून तिका मरण आयिल्लें. तीच परिस्थिती ह्या हॉलाचेर येवन संकश्ट येवचे न्हय असो विचार करून जिल्होधिकारी, मामलेदार, पालिका मंडळ हांणी थाराव घेवन हॉल मोडपाचें थारायिल्लें.
ते प्रमाण काल (सोमारा) सकाळीं धा वरांचेर हॉल मोडपाची ऑडर दक्षीण गोंय जिल्होधिकाऱ्यांनी दिल्ली. ते प्रमाण उपजिल्होधिकारी मिलिंद्र वेळीप, मामलेदार तशेंच मुख्याधिकारी सिद्धार्थ प्रभू, पालिका मंडळ, पालिका कर्मचारी, पुलीस पंगडाक घेवन हॉल मोडपाचे तयारींत आयिल्ले आसतना चिकन विक्रेत्यान हॉल मोडपाक थोडो कळाव जाल्ल्यान तीच संद सादून उच्च न्यायालयाची स्टे ऑडर हाडून तात्पुरतें हॉल मोडपाचें बंद दवरलें.
काल सकाळीं धा वरांचेर हॉल मातयेभरवण करपाची न्यायालयाची ऑर्डर आसतना इमारत मोडपा खातीर यंत्रणा उसरां कित्याक आयली हीच चर्चा सद्या सांग्यार सुरू आसा. ही इमारत मातयेभरवण जावंक जाय, नाजाल्यार हांगा केन्नाय अनर्थ घडटलो हें पळयले उपरांत कळून येता.
इमारत मोडपाक आमचो विरोध ना. पूण आमच्या हक्काची सुवात आमकां जाय. आमच्या पयलींचे सुवातेंतल्यान हालयतना आमकां एक फ्लॅट आनी दुकान दिता म्हूण नगरपालिकेन सांगिल्लें. पूण तें दिलें ना. आमचें 100 मिटराचें घर आशिल्लें. 19 नंबर दुकान आशिल्लें. हें मोडले उपरांत पालिकेन आमकां वाऱ्यार सोडले आमकचो हक्क आमकां दियात, तेन्नाच ही सुवात सोडटां अशें चिकन विक्रेत्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
