भांगरभूंय | प्रतिनिधी
पणजी: चिंबल जंक्शना कुशीक बुधवारा रातीं पांच वाहनांचो भिरांकूळ अपघात जालो. हातूंत वाहनांचें व्हड प्रमाणांत लुकसाण जालें. ह्या प्रकरणांत पोरणें गोंय पुलिसांनी ट्रक चालका आड गुन्यांव दाखल करून तपास सुरू केला.
पोरणें गोंय पुलिसांनी दिल्ले म्हायती प्रमाण बुधवारा रातीं 11 वरांचेर चिंबल जंक्शना कुशीक आशिल्लो सिग्नल पडिल्लो. ताका लागून पोरणें गोंया सावन पणजेचे दिशेन वचपी एक ट्रक राविल्लो. ताचे फाटल्यान दोन मोटारी राविल्ल्यो. ह्याच वेळार ताचे फाटल्यान येवपी ट्रक चालकाचो ताबो सुटिल्ल्यान ताणें मुखार आशिल्ल्या तिनूय वाहनांक धपको दिलो. उपरांत मुखा वेल्यान येवपी स्विफ्ट मोटारिकूय धापको दिवन मुखार गेलो. तशेंच अपघातांत कारण थारिल्ल्या ट्रक चालकान थंय सावन पळ काडपाचो यत्न केलो. ह्या वेळार थळाव्या लोकांनी ताचो फाटलाग करून ताका धरलो.
ह्या प्रकरणांत स्विफ्ट मोटारींत आशिल्ली बायल किरकोळ जखमी जाल्ल्यान तिका रोखडीच बांबोळे गोमॅकाँत व्हेली. थंय तिचेर मुळावे उपचार करून तिका घरा धाडून दिली. जाल्यार अपघातांत तीन मोटारी आनी एका ट्रकाचें व्हड लुकसाण जालें.
ह्या प्रकरणांत पोरणें गोंय पुलीस निरिक्षक राघोबा कामत हांच्या मार्गदर्शना खाला हवालदार प्रेमनाथ फडते हांणी अपघाताचो पंचनामो करून ट्रक चालका आड गुन्यांव दाखल केला.
मजगतीं, खोर्ले पेत्रोल पंपा कुशीक 1 जून दिसा सकाळीं 7.55 वरांचेर बस आनी दुचाकी मदीं अपघात जाल्लो. ह्या प्रकरणांत पोरणें गोंय पुलिसांनी बस चालक अभय फडते हाचे आड गुन्यांव दाखल करून तपास सुरू केला.
पुलिसांनी दिल्ले म्हायती प्रमाण शेनवार 1 जून दिसा सकाळीं 7.55 वरांचेर प्रवासी बस बाणस्तारी सावन पोरणें गोंयचे दिशेन वताली. त्या वेळार खोर्ले पेत्रोल पंपा कुशीक पावतकच बस चालकान मुखार वचपी वाहनाक ओव्हरटेक करपाचो यत्न केल्ल्यान येवपी दुचाकीक नेटाचो धपको दिलो. त्या वेळार दुचाकी चालक फोंडेंचो उद्धव नायक जखमी जालो. ताचेर बांबोळे गोमॅकाँत उपचार सुरू आसात.
ह्या प्रकरणांत पुलीस निरिक्षक राघोबा कामत हांच्या मार्गदर्शना खाला हवालदार सतीश ठाकूर हांणी अपघाताचो पंचनामो करून बस चालक अभय फडते आड गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
