चिंबलाचे ‘ते’ तळयेच्या वादाक लागून अंदूंय गणपती विसर्जन जावंक ना
भांगरभूंय | प्रतिनिधी
चिंबल: सांताक्रूझ मतदारसंघांतल्या चिंबलाचे ‘ते’ वादग्रस्त तळयेचो प्रस्न अंदूंय सुटावो जावंक ना. ह्या वादाक लागून अंदूंय गणपती विसर्जन जावंक ना. हें प्रकरण न्यायालयांत आसा. हाचेर तात्पुरतो उपाय म्हणून हे तळये लागीं आशिल्ल्या खाजगी बांयेंत गणपतीचें विसर्जन करचें अशें सांगलें. मजगतीं, हांगा विसर्जन करतना ते बांयेंत गोबर गॅस प्लांट लायिल्ल्याचें दिसून आयलें.
मजगतीं, गांवच्या लोकांनी देड, ५, ७ आनी आतां ९ दिसांच्या गणरायाच्या मूर्तीचे विसर्जन करीनासतना मूर्तीचेर उदक ओतलें आनी विसर्जनाचें शास्त्र करून सगळ्यो मूर्ती बांय भोंवतणी दवरल्यो. सद्या हांगां वट्ट ५० गणेशमूर्ती आसात. मजगतीं, सरकाराच्या वाठारांत आशिल्ल्या वादग्रस्त तळयेक लागून ह्या जाग्याच्या गांवकारांनी खूबदां निशेध केलो. जायते फावट प्रशासकीय अधिकारी आनी पुलिसांनीय योग्य उपाय सोदून काडून हो वाद शांत करपाचो यत्न केलो.
विधानसभेंतूय ताचेर जायते फावट चर्चा जाली. पयलीं सांतआंद्रेचे आमदार विरेश बोरकार आनी उपरांत सांताक्रूझाचे सध्याचे आमदार रुडॉल्फ फर्नांडिस हांणी मुख्यमंत्र्याक हे विशीं खूबदां विचारलें. चवथी मेरेन हो प्रस्न सुटावो जातलो अशें उतर मुख्यमंत्र्यान दिलें. पूण तरी लेगीत आजूनूय कांयच जालें ना. उल्लेख केल्ली तळी ही गणपती विसर्जन तशेंच सरस्वती विसर्जन करपा खातीर पारंपरीक सुवात आसा. मुळांत सरकारी जमनींत आशिल्ले तळयेची लीज प्रक्रिया चालू आसतना प्रशासकीय अधिकाऱ्यांनी तरी हाचेर लक्ष दिवचें अशें मत गांवच्या लोकांचे आशिल्लें. आतां बांय भोंवतणीं दवरिल्ल्यो गणेशाचीं मूर्तीं योग्य रितीन विसर्जन जावंक नाशिल्ल्यान नागरिकां मदीं उदासीनताय आसा.
नेमकें प्रकरण कितें?
ही गजाल पयलेच खेपे 31 ऑगस्ट 2019 दिसा उजवाडाक आयली. गणेश विसर्जना खातीर वापरपी पारंपरीक तळी एका रातींत मातयेन भरुन काडिल्ली. चिंबलाचे तेन्नाचे सरपंच चंद्रकांत कुंकळकार आनी पंच वांगडी लक्ष्मण अडकोणकार हांणी हे सुवातेर पळोवणी केली. उपरांत थळाव्या लोकांक विस्वासांत घेवन पंचायत, पोरणें गोंय पुलीस स्टेशन, उत्तर गोंय जिल्होधिकारी आनी हेर प्रशासकीय अधिकाऱ्यांक पत्र बरोवन आनी ह्या प्रकरणात लक्ष घालपाची मागणी केली.
मजगतीं, थळाव्या लोकांनी उल्लेख केल्ल्या जाग्याचे पोरणें फोटो जोडून हांगा जायते वर्सा सावन अशें धर्मीक विधी चलत आयल्यात हाचो पुरावो दिलो. तेन्नाचे उत्तर गोंयचे जिल्होधिकारी आर मेनका हांणी लोकांचें आयकून उपजिल्होधिकाऱ्यांक ह्या प्रकरणाची चवकशी करपाचो आदेश दिलो.
उपजिल्होधिकाऱ्यांनी थळाव्या लोकांक आपल्या कार्यालयांत आपोवन उपाय काडपाचें उतर दिल्लें. थळाव्यांक सर्वेक्षण क्रमांक आनी उल्लेख केल्ल्या जाग्याचो हेर तपशील सादर करूंक अपेश आयलें. ही जमीन प्रोव्हेदोरियाची आसा अशें सर्वेक्षण खात्याच्या पंगडान निरीक्षण नोंद केलें. उपरांत लीज धारकांनी लीजा कडेन संबंदीत कागदपत्रां सादर केलीं. हें प्रकरण फाटलीं पांच वर्सां प्रलंबीत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
