भांगरभूंय | प्रतिनिधी
पणजी ः पणजी-फोंडें राष्ट्रीय म्हामार्गाचेर चिंबल वाठारांत राज्य भाजपाचें नवें सुसज्ज कार्यालय बेगीनूच स्थापन जातलें. हे संबंदी कागदपत्रां पुराय जाल्यांत. आतां बेगोबेग बांदकाम सुरु करतले. ह्या कार्यालयाचे भाजपा अध्यक्ष जे. पी. नड्डा हांचे हस्तुकीं उक्तावण जातलें अशी म्हायती राज्यसभा खासदार आनी भाजपाचे प्रदेशाअध्यक्ष सदानंद शेट तानावडे हांणी दिली.
भाजपाचे लोकसभा वेंचणूक प्रभारी आशीष सूद हांचे कडेन मंगळारा जाल्ले बसके उपरांत ते पत्रकारां कडेन उलयताले. सध्या पणजीत भाजपाचें मुखेल कार्यालय कार्यरत आसा. पूण हें कार्यालय कामाक अपुरे पडटा देखून चिंबल हांगा पदाधिकारी आनी कामगारांक गरजेच्यो सगळ्यो सुविधा सयत नवे कार्यालय बांदपाचो निर्णय पक्षान घेतला. कार्यालय स्थापन करपा खातीर कायदेशीर प्रक्रिया आनी कागदपत्रां पुराय जाल्यांत. ते खातीर बेगीनूच कार्यालयाचें बांदकाम सुरु करतले अशें तानावाडे हांणी सांगलें.
मजगतीं, भाजपा वेंचणूक प्रभारी आशीष सूद हांचे कडेन जाल्ले बसकेंत प्रधानमंत्री नरेंद्र मोदी हांची गोंय भेट आनी लोकसभा वेंचणुके विशीं चर्चा जाली. वेंचणुकेचे फांटभूंयेर ‘गांव चलो’ मोहीम भाजपा कडल्यान चालीक लायतले. ही मोहीम 9 ते 12 फेब्रुवारी मेरेन राज्यांतल्या 1,722 बूथांचेर आयोजीत करतले. मंत्री, भाजपा आमदार, पदाधिकारी आनी कार्यकर्ते बूथांचेर वचून परत एक फावट केंद्र आनी राज्य सरकाराच्या येवजण्यांचो प्रचार आनी प्रसार करतले अशें तानावाडे हांणी सांगलें. मजगतीं, लोकसभा वेंचणुके खातीर दोनूय वेंचणूक कार्यालयांचे 15 फेब्रुवारी मेरेन उक्तावण करतले असोय उल्लेख तांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
