भांगरभूंय | प्रतिनिधी
पणजी : गोंय मलेरिया मुक्त जावपाक सामकें लागीं पावलां. २०२६-२७ वित्तीय वर्सा गोंय मलेरिया मुक्त करपाचो हेतू भलायकी खात्याचो आसा अशें राष्ट्रीय वेक्टर बोर्न रोग नियंत्रण कार्यावळीची उपसंचालिका डॉ. कल्पना महात्मे हांणी सांगलें. संवसारीक मलेरिया दिसा निमतान पणजे आयोजीत केल्ले कार्यावळींत ती उलयताली. ह्या वेळार उत्तर गोंय जिल्लोधिकारी अंकित यादव, डॉ. मनीष गावणेकार, शुभदा पेडणेंकार आनी हेर अधिकारी हाजीर आशिल्ले.
डॉ. महात्मे हांणी मुखार म्हणलें, गोंयांत फाटली कांय वर्सां थळाव्यांक (इंडिजीनियस) मलेरियाची लागण जावंक ना. राज्यांत २०१८ सावन मलेरिया जाल्ल्या एकाय दुयेतीक मरण येवंक ना. हाका लागून गोंय मलेरिया मुक्तीच्या मार्गार आसा. सध्या राज्यांत सांपडपी मलेरियाचे दुयेंती हे स्थलांतरीत कामगार आसात. खुबशे फावटीं बांदकाम प्रकल्प कामगारां मदीं मलेरिया मेळटा. राज्य भलायकी कायद्या प्रमाण आमी बांदकाम, जेटी, हॉटेल खुबश्या सुवातांचेर काम करपी कामगारांची तपासणी करतात.
तशेंच खात्या वतीन स्थलांतरितांच्या वसणुकेंतूय तपासणी मोहीम सुरू आसा. स्थलांतरीत कामगारांमदीं मलेरिया सांपडल्यार ताच्या राज्यांतलें भलायकी खात्याकूय हाची कल्पना दिता. गोंयांत दरेक हजार लोकां फाटल्यान मलेरिया जावपाचें दर २०२२ सावन शुन्य आसा. खात्यान दक्षीण गोंय जिल्लो मलेरिया मुक्ती प्रमाणपत्र मेळोवपा खातीर केंद्राकडेन प्रस्ताव धाडला. ह्याच म्हयन्यांत केंद्रीय अधिकार्यांनी गोंयांत येवन पळोवणी केल्ली. सरकारान मलेरिया मुक्ती खातीर केल्ले यत्न तांकां आडवाल्यात.दक्षीण गोंय जिल्ह्याक बेगीनूच मलेरिया मुक्त प्रमाणपत्र मेळटलें अशी आमची अपेक्षा आसा, अशें तिणें सांगलें.
मन की बात खातीर निवड
डॉ. महात्मे हांणी सांगलें, फाटल्या कांय वर्सांनी गोंयान मलेरिया नियंत्रणा खातीर केल्ल्या यत्नांची प्रधानमंत्री कार्यालयानूय दखल घेतल्या. कार्यालयान गोंयांत मलेरिया नियंत्रणा खातीर राबयिल्ल्या उपक्रमांची म्हायती मागयल्या. प्रधानमंत्री नरेंद्र मोदी हांच्या येवपी मन की बातांत गोंयच्या यत्नांचो उल्लेख करतले.
#Goa #Maleria #Health #Indiginious
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
