भांगरभूंय | प्रतिनिधी
विधानसभेंत पर्यावरण खात्याची म्हायती
पणजी, प्रतिनिधीः फाटल्या चार म्हयन्या सावन 44 आवाज प्रदुशणाच्यो कागाळी नोंद जाल्यात. फुडाराक आवाजाच्या प्रदुशणाचेर नियंत्रण दवरपा खातीर 20 देखरेख दवरपी माक्ना गोंयभर बसयतले, अशी म्हायती पर्यावरण मंत्री आलेक्स सिक्वेरा हांणी विधानसभेच्या लेखी जापेंत दिली.
एप्रिल 1 ते आतां मेरेन कितल्यो आवाज प्रदुशणांच्यो कागाळी नोंद जाल्यात आनी आवाज प्रदुशणाचेर देखरेख दवरपा खातीर खात्यान कसली यंत्रणा घेवपाची येवजण आसा असो प्रश्न मंत्र्याक विचारिल्लो.
विधानसभेच्या पटलार म्हायती दितना मंत्र्यान सांगलें, 22 कागाळी गोंय प्रदुशण नियंत्रण म्हामंडळा कडेन नोंद आसात. दक्षीण गोंय जिल्लोधिकारी आनी ताचे संबंदीत कचेरेत 4 कागाळी आयल्यात. 15 कागाळी उत्तर गोंय जिल्लो दंडाधिकाऱ्या कडेन आयल्या आनी सगळ्यो कागाळी संबंदीत पुलीस स्टेशनांत कारवाय करपा खातीर धाडल्यात.
म्हामंडळा कडेन नोंद आशिल्ल्यो 22 कागळी मदल्यो 16 कागाळींचेर अजूनय कारवाय जावपाची आसा. जाल्यार 6 प्रकरणा जिल्लोधिकारी, दंडाधिकारी, पुलीस आनी पंचायती कडेन कारवाये खातीर धाडल्यात.
जाल्यार दक्षीण गोंय जिल्लोधिकाऱ्या कडेन आयिल्ल्यो 4 कागाळी मदल्यो तीन पुलीस स्टेशनांत कारवाय खातीर धाडल्यात. जाल्यार एक कागाळ बाणावलें कोंकणी मॅगा शोव आड दाखल केल्ली. सालसेट दंडाधिकाऱ्यांकडेन हे प्रकरण धाडिल्ले उपरांत दंडाधिकाऱ्यान हे कार्यावळीक परवानगी दिली.
जाल्यार उत्तर गोंय दंडाधिकारी कचेरेत दाखल जाल्ले 15 कागाळे मदल्यो 2 कागाळी म्हापशें उप विभागीय पुलीस अधिकाऱ्यांक धाडिल्ल्यो आनी जर उल्लघंन जाल्ले आसत ताचेर कारवाय जातली अशे पुलिसांनी सांगिल्ले. पूण बाकीच्या 13 प्रकरणाचेर कसली कारवाय केल्या हाची कसलीच जाप खात्यान दिवंक ना. तशेंच आवाजाच्या प्रदुशणाचेर नियंत्रण दवरपा खातीर गोंयच्या 8 सुवातींनी ऑनलायन नोयज मिटर बसयतले.
मोरजी, वागातोर, हणजूणां, कळंगुटे, कांदोळें, मांद्र्यां, बाणावलें आनी कोलवा हे वाठार मिटर बसोवपा खातीर वेंचल्यात. तशेंच एम्बियंट नोयज मोनिटरींग यंत्रणा गोंयच्या 12 वाठारांनी उबारपाचो प्रस्ताव आसलो. हे खातीर पाच वर्सांच्या कालावधी खातीर निविदा काडिल्ली. पूण बजेटांत ताची तरतुद जावंक नासली. आश्वे, कळंगुटे, बागा, हडफडे, कांदोळें, हरमल, मोरजी, कोलवा, केळशी, मांद्र्यां, बाणावलें आनी आगोंद हांगा यंत्रणा येवपाची आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
