भांगरभूंय | प्रतिनिधी
वास्को, प्रतिनिधी: झुआरीनगरच्या चाकूहल्ल्या उपरांत थंयचे गुंडागिरीचेर चर्चा चल्ल्या. तिचेर नियंत्रण दवरपाक पुराय दर्जाच्या पुलीस स्टेशनाची गरज आसा, अशी प्रतिक्रिया नागरीक उक्तायतात. आदीं हांगा स्वतंत्र पुलीस स्टेशन उबारपाचे यत्न जाल्ले. मात तें स्टेशन कागदाचेरूच उरलें. वेर्णें पुलीस स्टेशनाची हद्द व्हडली आशिल्ल्यान पुलिसांक सगळे कडेन लक्ष दवरप कठीण जाता. सध्या झुआरीनगरांत सांकवाळ पुलीस चौकी आसा. ती फकत नांवा खातीर. खंयचीय व्हडली घडणूक हे चौके कडेन हाताळपाक जायना. ताका लागून चौके वयल्या पुलिसांक वेर्णें पुलीस स्टेशनाचेर निंबून रावचें पडटा.
झुआरीनगरांतल्या बार अँड रेस्टारंटांत फाटल्या मंगळारा जाल्ल्या वादांतल्यान मंजुनाथ नवली (२८) हाचेर चाकवान आनी कंवचेच्या ग्लासान हल्लो केलो. ताचो चुलत भाचो शर्वण कुमार (२२) हो मात्सो वाटावलो. हे संबंदी वेर्णें पुलिसांनी सांकवाळेचे आदले पंच रंगाप्पा कमल (४२) हाका अटक केली. जाल्यार शिवानंद हिरेगौडा, युवराज चिंबल, दिपक हिरेमती हे बिर्ला झुआरीनगरचे तरणाटे फरारी जाले. ह्या हल्ल्या उपरांत झुआरीनगर पुलीस चौकेच्या पुलिसांनी गस्त घालपाक सुरवात केल्या. ती कितले दीस चलतली हें सांगपाक येना. मात हांगाचे गुंडगिरी विशीं नागरिकांनी हुस्को उक्तायला.
वेर्णें पुलीस स्टेशनाचे हद्दींत झुआरीनगर, बिर्ला, सांकवाळ आनी वेर्णा उद्देगीक वसणूक, नुवेंचो कांय भाग, कांसावले, वेळसांव, कुठ्ठाळे पंचायत तशेंच हेर वाठार येतात. हो वाठार व्हड आशिल्ल्यान आनी लोकवस्ती वाडिल्ल्यान वेर्णें पुलीस स्टेशनाचेर ताण येता. सांकवाळ, झुआरीनगर,बिर्ला खातीर वेगळें पुलीस स्टेशन उबारपाचो प्रस्ताव आयिल्लो. ते प्रमाण आतांचे झुआरीनगर पुलीस चौकेच्या जाग्यार पुलीस स्टेशनाची इमारत उबारपाक पळोवणी केल्ली. तेन्ना हो जागो ते खातीर योग्य नाशिल्ल्याचें स्पश्ट जालें.
उपरांत कुठ्ठाळेची आमदार, मंत्री एलिना साल्ढाणा हांणी उपासनगर-सांकवाळे एका जाग्याची पळोवणी करून थंय पुलीस स्टेशन उबारपाचो निर्णय घेतिल्लो. हे विशींचे सगळे सोपस्कार जाले. मदींच हें पुलीस स्टेशनाच्या बांदकामा संबंदी कांय आडखळी निर्माण जाल्ल्यान सगळें थंड जालें.
झुआरीनगरांत तीस हजारां परस चड लोकसंख्या आसा. हांगा शांतिकाय तिगून उरचे खातीर पुलीस स्टेशनाची गरज आसा. एक उपनिरीक्षक, दोन पुलीस आशिल्ली झुआरीनगर पुलीस चौकी हांगाच्या गजालींचेर नियंत्रण दवरपाक शकना. सांकवाळ पुलीस स्टेशन आयल्यार झुआरीनगर, सांकवाळ आनी हेर भागांचो ह्या पुलीस स्टेशनांत आसपाव करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
