भांगरभूंय | प्रतिनिधी
तुजे म्हजे मदीं
आसा तरी कितें अशें
ना मेळप, ना वाट पळोवप
तरीय आयकना मन पिशें
कितल्याशाच तरण्या मनांतली ही भावना! अशे सहजतायेन बरयिल्ल्या 56 कवितांचो हो झेलो. आपल्या काळजांतले विचार आमचे मुखार दवरपाचो सार्थ यत्न केला 2 एप्रील 2023 ह्या दिसा ‘चांफो’ ह्या पुस्तकाच्या कवीन. हो कविता झेलो अन्वेषा सिंगबाळ हांणी बरयला. संजना पब्लिकेशन्स हांणी हें पुस्तक प्रकाशीत केलां.
‘सुलूस’ आनी ‘पडसाद’ ह्या 2 कविता झेल्या उपरांत प्रकाशीत जाल्लो ‘चांफो’ ह्या पुस्तकांतल्यो कविता आमकां मनांतल्यो खूबश्यो भावना, नातीं, मोग, यादी, स्पर्शाचो अर्थ अशा जायत्या विशयांचेर विचार करपाची कळाशी जागी करता.
एक चांफो! जावं तो आंगणांत शिंपडिल्लो, जावं माथ्याक माळिल्लो. कवी म्हणटा-
चांफो गच्च झाडावेलो
आंगणांत शिंपडिल्लो
चांफो यादींचो
काळजांत लिपयिल्लो.
बर्याच वेळार आमच्या मनांतले विचार एकामेकां कडेन झगडटना आमकां जाणवता. अशा वेळार कितें बरोबर कितें चुकीचें कांयच समजना. अशीच एक कविता-
बुडचें कांय तरंगचें
व्हांवचें कांय विसवचें
जगचें कांय घुस्मटचें
घुस्पूचें काय समजुचें
समजुनय अडकुचें
अडकून मागीर झगडचें
स्वताच कडेन स्वता खातीर
बांदचें नातें सासणाचें
आयच्या काळार आमी व्हडलीं व्हडलीं घरां बांदिल्लीं पळयतात पूण तातूंत कोणूच ना-
एक घर
येद्दें व्हडलें
भितर कोण ना
एक काळीज
येदेशें
भितर तुमी सगळीं
खूब साद्या आनी सरळ
उतरांनी बरयिल्ल्यो ह्यो कविता दर एकल्यान वाच्च्यो. कवी कशें आपल्या
जगांत रावन संवसारांत घडपी दर
एके गजालीचें निरिक्षण करतना
आमकां दिसून येता. असो हो कविता
झेलो मुजरत वाचपाक जाय अशें म्हाका दिसता.
खुशी प्रभुदेसाय
8788951529
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
