भांगरभूंय | प्रतिनिधी
चांदेल : चांदेल-हंसापूर मुखेल रस्त्यार नव्या पुलाचें बांदकाम झुजां पावंड्यार पुराय केलां. मात तो आजूनय येरादारी खातीर हो पूल उक्तो करूंक ना. पुलाचे कमानीचेर स्लॅब कॉंक्रीटाचें काम जाल्ल्यान कांय काळ कळाव जाल्ल्याचें सांगता. येरादारी खातीर तयार केल्लो पर्यायी रस्तोय हालीं घोग्यांनी पडपी पावसाक लागून व्हांवून गेलो. हाका लागून थळावे नागरीक, विद्यार्थी आनी कामगार वर्गाक व्हडा प्रमाणांत गैरसोयींक तोंड दिवचें पडटा.
कामा निमतान यो-वच करपी नागरिकांक आतां मेळटा त्यो वाटो-रस्त्यांचो वापर करून धोंपरभर उदकांतल्यान वाहनां चलयत प्रवास करचो पडटा. नागरिकांनी प्रशासनान बेगोबेग पर्यायी वेवस्था करून नवो पूल बेगोबेग येरादारी खातीर उक्तो करचो, अशी मागणी केल्या. काल रातीं कांय प्रमाणांत पावस पडिल्ल्यान आनी चांदेलच्या नव्या पुलाचें काम सुरू आशिल्ल्यान पर्यायी रस्त्यार उदक सांठून उरलें.
आयज सांजेवेळार मेरेन हलकीं वाहनां सोडटले: आमदार आर्लेकार
पेडणेंचे आमदार प्रवीण आर्लेकार हांणी पर्यायी रस्तो आनी नव्या पुलाची पळोवणी केली. लोकांची आडखळ पयस करपा खातीर सांजेवेळार मेरेन नव्या पुलावेल्यान हलकीं वाहनां, दुचाकी सोडटले अशें सांगलें. सध्यातरी ह्या पुलावेल्यान जड वाहनां सोडचे नात, अशें आमदार आर्लेकार हांणी स्पश्ट केलें.
ChandelHansapu #Pernem #RoadUndeWater #RainWaterOnRoad #GoaNews #NewsInKonkani
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
