भांगरभूंय | प्रतिनिधी
काँग्रेस पक्षांत दोन गट; तीन नांवांची चर्चा; दिल्लींत प्रक्रिया सुरू
पणजी: चवथी उपरांत प्रदेश काँग्रेसींत परतून एकदां व्हड प्रमाणांत घडामोडी घडपाच्यो आसून, प्रदेशाध्यक्षूय बदलतले. हे खातीर सद्या तीन नांवांची चर्चा सुरू आशिल्ल्याची म्हायती काँग्रेसीच्या गोपांनी ‘भांगरभूंय’ कडेन उलयतना दिली.
लोकसभेची वेंचणूक सात म्हयन्यांचेर येवन पाविल्ली आसून लेगीत प्रदेश काँग्रेसींतलें सुस्तीपण अजून गेल्लें ना. प्रदेशाध्यक्ष अमीत पाटकार हांचे आड पदाधिकारी आनी कार्यकर्त्यांच्यो कागाळी वाडत चल्ल्यात. अमीत पाटकार आनी गिरीश चोडणकार अशे दोन गट स्पश्टपणान पक्षांत दिसून येतात.
चोडणकार समर्थक अमीत पाटकार हांकां अध्यक्ष म्हूण स्विकारपाक अजून लेगीत तयार नात. अमीत पाटकार हांणी कांय दिसां पयलीं पांच जाणांक पक्षांतल्यान निलंबीत केले उपरांत कांय पदाधिकाऱ्यांनी तांची कागाळ थेट पक्षश्रेश्ठीं मेरेन केल्ली. ह्या अंतर्गत धुसफुसीचो पक्षाक लोकसभा वेंचणुकेंतूय फटको बसपाची शक्यताय आशिल्ल्यानूच प्रदेशाध्यक्षपदार दुसऱ्या फुडाऱ्याची निवड करपाची प्रक्रिया काँग्रेसींतल्या दिल्लींतल्या फुडाऱ्यांनी सुरू केल्या. चवथी उपरांत ह्या घडामोडींक नेट येवपाची शक्यताय आसा अशें गोपांनी सांगलें.
मजगतीं, विधानसभा वेंचणुकेंतले हारीची जापसालदारकी स्विकारून गिरीश चोडणकार हांणी प्रदेशाध्यक्षपदाचो राजिनामो दिले उपरांत तांचे सुवातेर अमीत पाटकार हांची नेमणूक केली.
लोकसभा वेंचणुके मेरेन वांगड्यांची संख्या वाडोवन आनी गट समित्यांक घटाय दिवन पक्षाक परतून उबे करपाचें मोटें आव्हान आनी संद पाटकार हांचे कडेन आशिल्ली. पूण तातूंत तांकां अजून मेरन येस आयिल्लें ना. खूबशे पदाधिकारी आनी कार्यकर्त्यांनी प्रदेशाध्यक्ष फोनूच घेनात अश्यो कागाळी प्रभारीं कडेन करीत आशिल्ल्याचेंय गोपांनी सांगलें.
येता ते लोकसभा वेंचणुकेचे फाटभुंयेर काँग्रेसीन हैदराबाद हांगा कार्यकारिणी वांगड्यांची बसका आयोजीत केल्या. हे बसकेंत गिरीश चोडकार हांचे सयत प्रदेशाध्यक्ष अमीत पाटकार आनी विरोधी पक्ष फुडारी युरी आलेमांव लेगीत हाजीर आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
