भांगरभूंय | प्रतिनिधी
मुंबय, खबरां संस्था: गणेशोत्सव आनी कोकण हांचें वेगळेंच नातें आसा. गणपती खातीर गोंयांत वा कोकणांत वचपा खातीर दोन म्हयन्यां पयलींच लोक तयारेक लागतात. रेल्वेन कोकणांत वचप म्हळ्यार पयलींच बुकींग करून दवरचें पडटा. रेल्वे प्रशासनूय गणेशोत्सवा खातीर चड गाडयो सोडटात. भायल्या राज्यांनी काम करपी चडशे रेल्वेचेरूच निंबून आसतात. कारण रस्त्यान गांवांत वचपाक भायर सरल्यार येरादारीचे कोंयडीक तोंड दिवचें पडटा. ताका लागून खुबशीं जाणां रेल्वेचेर निंबून आसतात. आतां कोकणांत वचपी रेल्वे गाडयांचें बुकींग १० मे सावन सुरू जाता.
दर वर्सा मुंबय, ठाणे, नवी मुंबय, पुणें वांगडा हेर शारांतले नागरीक गणपती खातीर आपापल्या गांवां वतात. अंदूं चवथ ७ सप्टेंबराक. ताका लागून ताच्यो १२० दीस आदींच म्हळ्यार १० मे सावन रेल्वे गाडयांचें बुकींग सुरू जातलें. ताका लागून अंदूं चाकरमान्यांक कन्फर्म तिकेट मेळपाची दाट शक्यताय आसा.
दर वर्सा चवथी कडेन आपापल्या गांवांनी, मूळ घरा वचपाक रेल्वेच्यो तिकेटी मेळोवपाक रांगो लावच्यो पडटात. मात कन्फर्म तिकेटी तात्कळत रावचें पडटा. केन्ना केन्ना ताची आस्त सोडची पडटा. ताका लागून गणपती खातीर अंदूं १० मे सावन तिकिटाचें बुकींग सुरू केल्ल्यान नागरिकांनी बेगीन तिकेटी बूक करपाचो उलो मारला. तशेंच गणेशोत्सव स्पेशल गाडयोय बेगीनूच सोडटले, अशेंय जाहीर केलां.
रेल्वेन जाहीर केल्ल्या वेळापत्रका प्रमाण शेनवार ४ मे २०२४ दिसा १ सप्टेंबरचें रेल्वे आरक्षण सुरु जातलें. तुमी आयआरटीसी आनी ऍपा वयल्यान बुकींग करपाक शकतात. रत्नागिरी, रायगड, सिंधुदुर्ग ह्या मार्गाचेर वचपी रेल्वे गाडयांचें बुकींग मंगळार ७ मे दिसा सुरु जातलें. ६ सप्टेंबराक हरतालिका आशिल्ल्यान हाचें बुकिंग बिरेस्तार ९ मे सावन सुरु जातलें. ७ सप्टेंबराक चवथ आशिल्ल्यान ह्या दिसा घराघरांनी गणराय येतले. तेन्ना ७ सप्टेंबराचें रेल्वे बुकींक शुक्रार १० मेक सुरू जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
