भांगरभूंय | प्रतिनिधी
फोंडें, प्रतिनिधी ः चलयेन सेगीत मोगाक न्हयकार दिल्ल्यान तिडकिल्ल्या तरणाट्यान व्हॅलेंटायन डे दिसाच तरणाटे चलयेचे तकलेर बियरीची बाटली मारून तिका जिवेशी मारपाचो यत्न केलो. हे घडणुकेंत पाळी-सांखळेची तरणाटी चली गंभीर जखमी जाली. जीएमसींत तिचेर उपचार सुरू आसात. जाल्यार दुबावीत तरणाटो मंथन गावडे (24, काळवाडो-उसगांव) हाका आत्महत्या करपाचो यत्न करतना फोंडें पुलिसांनी उसगांव पुला लागसरल्यान ताब्यांत घेतलो.
मूळ पाळीचें हें चली कुटुंबा सयत उसगांवां भाड्याच्या बिराडाक रावतालें. उसगांवच्या मशरूम फॅक्टरींत तें कामाक वतालें. तिच्या भाड्याच्या कुडीं सावन अर्द वराचे वाटेर कारखानो आसा. सदचे भशेन आयज सकाळीं 6 वरांचेर तें फॅक्टरींत चलत वचपाक भायर सरलें. कांय अंतराचेर निर्जन वाठार आसा. ह्या जाग्यार मंथनान ताका आडायलें आनी बियरीची बाटली नेटान ताचे तकलेर मारली. तें चली सकयल पडल्या उपरांत मंथन थंयच्यान पळून गेलो. तो एक निर्जन वाठार आशिल्ल्यान ताचे मजतीक कोणूच पावलो ना.
दोन वरां उपरांत सांपडलें चली…
सकाळीं सुमार 9 वरांचेर जखमी चली 200 मिटर अंतर हुंपून मुखेल रस्त्यार पावलें. उपरांत ताची स्थिती पळोवन वाटे वयल्यान वचपी लोकांनी ताका रोखडेच उपचारा खातीर जीएमसींत दाखल केलें. उपरांत फोंडें पुलिसांक हे घडणुकेची म्हायती दिली. सुमार दोन ते अडेज वरां तकलेंतल्यान रगत गेल्ल्यान ताची स्थिती गंभीर आसा.
तरणाटे चलयेक गंभीर स्थितींत सोडून मंथन थंयच्यान पळून गेलो. उपरांत फोंडें पुलीस ताचो सोद घेताले. दनपारां सुमार 12.30 वरांचेर मंथनान उसगांव पुला वयल्यान आत्महत्या करपा खातीर उडी मारली अशी खबर तांकां मेळ्ळी. पुलीस थंय पावतकच मंथन न्हंयचे देगेर तांकां सांपडलो. ताका पेंवपाक येतालें. देखून उडी मारल्या उपरांत तो पेंवून देगेर पावलो. थंयच्यान ताका पुलिसांनी ताब्यांत घेतलो. फोंडें पुलीस निरिक्षक तुषार लोटलीकार फुडलो तपास करता.
देड म्हयन्या आदीं तरणाट्याक पुलिसांनी दिल्ली शिटकावणी…
पाळीचें चली आपल्या कुटुंबा सयत उसगांवां भाड्यान घेतिल्ले कुडींत रावता. मंथन तिचेर मोग करतालो. पूण चलयेक तो आवडा नाशिल्लो. तरी लेगीत तो तिका त्रास दितालो. केन्ना केन्ना तो तिच्या घरा वचून तिका धमकायतालो. देखून देड म्हयन्या आदीं तिणें मंथना आड फोंडें पुलिशेंत कागाळ दाखल केल्ली. कागाळीची दखल घेवन पुलिसांनी मंथनाक पुलीस स्टेशनांत हाडून समजायलो. तशेंच तिका फोनाचेर संपर्क करचो न्हय अशीय शिटकावणी दिल्ली. कांय दिसांनी इश्टांच्या फोनांतल्यान तो परत संपर्क करून चलयेक त्रास दिवपाक लागलो. तिच्या सतत न्हयकाराक लागून रागान आयज तांणे तिचेर हल्लो करून स्वता आत्महत्या करपाचो यत्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
