भांगरभूंय | प्रतिनिधी
मडगांवः आदले मंत्री चर्चिल आलेमांव हांणी फाटल्या कांय दिसां सावन काँग्रेस पक्षाची तोखणाय करपाक सुरवात केल्या. तशेंच काँग्रेसींत वचपाची तयारी तांणी दाखयल्या. आतां धूव वालंका आनी साविओ आलेमांव हांचे वांगडा काँग्रेसीचे प्रदेश अध्यक्ष गिरीश चोडणकार हांची चर्चिल हांणी भेट घेतली. हाका लागून चर्चिल हांच्या काँग्रेसींत प्रवेशा संबंदीं चर्चा सुरू जाल्या. गिरीश चोडणकार हांची गोवा प्रदेश काँग्रेस समितीचे अध्यक्ष म्हणून परतून नेमणूक जाल्या. हे फाटभुंयेर आदले मंत्री चर्चिल आलेमांव तांकां मेळ्ळे.
गोंयांत जावपी विधानसभा वेंचणुके खातीर राजकी वातावरण तयार जावपाक लागलां. हे फाटभुंयेर चर्चिल आलेमांव आनी गिरीश चोडणकार हांच्या मेळाव्या संबंदीं चर्चा चालू आसा. भलायकेच्या कारणांक लागून वेंचणूक लढोवचो ना अशें चर्चिल आलेमांव हांणी हाचे आदीं सांगिल्लें. पूण फाटल्या कांय दिसां सावन प्रसार माध्यमां कडेन उलयतना ते बाणावली मतदारसंघांतल्यान विधानसभा वेंचणूक लढयतले आनी नावेली मतदारसंघांतल्यान वालंका आलेमांव वेंचणूक लढयतली अशें सांगत आसा.
आतां गिरीश चोडणकार हांची प्रदेशाध्यक्ष पदाचेर नेमणूक जाले उपरांत तांणी काँग्रेस पक्षाची तोखणाय करपाक सुरवात केल्ली. कोणेंय कितलोय यत्न केलो तरी हो पक्ष नश्ट जावचो ना. तशेंच काँग्रेसीची तिकेट मेळ्ळी जाल्यार ती नक्कीच मान्य करतलों अशें सांगून काँग्रेसींत वचपाची तयारी तांणी उक्तायिल्ली. हे फाटभुंयेर आलेमांव कुटुंबाचो काँग्रेसींत प्रवेश वा फुडाराक राजकी युती विशीं चर्चा सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
