भांगरभूंय | प्रतिनिधी
घरच्यांनी केलो एक व्हिडिओ जारी
पणजी : फिजिओथेरपिस्ट आनी समाज वावुरपी डॉ. केतन भाटीकार (४१) हांच्या मरणा उपरांत सोशल मिडियाचेर सुरू आशिल्ली आरती परती चर्चा, तर्कवितर्क आनी वावड्यांक लागून भाटीकार कुटूंब सामकें अस्वस्थ जालां. हे फाटभूंयेर, डॉ. केतन हांच्या व्हडल्या भावान, घरच्या वांगडां एक व्हिडिओ जारी करून, ‘आमचेर दुख्खाचो दोंगर कोसळ्ळा. अश्या वेळार कोणेंच ह्या प्रकरणाचें राजकारण करचें न्हय’ अशी मागणी गोंयकारांक केल्या.
डॉ. भाटीकार हांकां १५ मेक मरण आयिल्लें. गोंयच्या सगल्या मळांचेर दुख्ख उक्तायलें. मात फाटल्या दोन- तीन दिसां सावन सोशल मिडियाच्या विवीध माचयां वेल्यान तांच्या मरणाचेर नाका जाल्ल्यो चर्चा आनी वावड्यो पातळटना दिसतात. नागरिकांच्या ह्या खर प्रतिक्रियांक लागून आनी सोशल मिडियावेल्या मरणाच्या ‘अदमासा’क लागून पुराय कुटुंबाक मानसीक त्रास सोंसचो पडटा, अशें डॉ. कौतुक भाटीकार हांणी सांगलें.
ह्या कठीण प्रसंगांत डाॅ. कौतुक हांणी जनतेक शांत रावपाचो उलो मारलो. डॉ. केतन हांचो बापूय किर्तीकुमार, आवय कादंबरी आनी भावजय सोनम भाटीकार ह्या व्हिडियोंत दिसतात. डॉ. केतन हांच्या मरणा उपरांत जांणी आमकां फोन केले आनी प्रत्यक्ष येवन सांत्वन केलें, त्या सगल्यांचे आमी उपकारी आसात. मात आतां आमकां कसलेच तरेच्या राजकारणांत ओडूं नाकात. केतन अचकीत गेल्ल्यान पुराय कुटुंबाक बरोच व्हड धक्को बसला. अशा वेळार सोशल मिडियाचेर सुरू आशिल्ल्या वावड्यांक लागून आनी चुकीच्या चर्चांक लागून संभ्रम अदीक वाडतूच आसा. जर लोकांक खरेंच डॉ. केतन हांचे विशीं सहानुभूती, आदर वा मोग आसा, जाल्यार तांणी तांच्या मरणावेल्यान राजकारण करचे सुवातेर डॉ. केतन हांणी सुरू दवरिल्लें समाजकार्य आनी तांचे विचार मुखार व्हरपाचे येत्न करचे. हीच तांचे खातीर खरीं आर्गां थारतलीं, अशी भावना तांच्या कुटुंबान उक्तायल्या.
निमाणें ह्या प्रकरणाक पुर्णविराम दितना कुटुंबीयांनी निवेदनांत स्पश्ट केलें की, डॉ. केतन भाटीकार हांच्या मरणा उपरांत आमचे खातीर राजकारण सोंपलें. ह्या मरणा विशीं कोणाकूच मनांत कसलोच दुबाव दवरपाची गरज ना. केतनाचो इश्ट सुशांत हो आमचे खातीर खूब कितें आसा आनी आमकां ह्या प्रकरणांत कसलेच तरेची चवकशी नाका, अशें सांगून कुटुंबान फकत शांतिकायेची विनवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
