भांगरभूंय | प्रतिनिधी
ताणें संवाद उलोवपाची आपली एक खाशेली शैली तयार केल्ली, जी ताका फुडल्या चाळीस वर्सां खातीर फिल्म मनरिजवणेच्या संवसारांत व्हड नांव मेळोवन दिवपाची आशिल्ली.
कलाकार
हिंदी सिनेमा सृश्टींतले अभिनेते ओम प्रकाशान सुमार 30 वर्सां प्रेक्षकांचें मनोरंजन केलें. ताचें पुराय नांव ओमप्रकाश छिब्बर. ताचो जल्म 19 डिसेंबर 1919 दिसा जम्मूंत जालो. रंगमाचये वयल्यान आपली कारकीर्द सुरू करपी म्हालगडो अभिनेतो शास्त्रीय संगीतांतय कुशळ आशिल्लो हें घडये लोकांक खबर नासतलें. जम्मूतल्या नामनेच्या दिवान मंदिर नाटक समाजाच्या नाटकांनी तो वांटो घेतालो. ओम प्रकाश हाणें 1950 ते 1980 मेरेन चित्रपटांत सहाय्यक अभिनेतो म्हणून काम केलें. जम्मूच्या गिरेस्त कुटुंबांतलो ओम प्रकाश संगीताचेर आशिल्ल्या मोगाक लागून रेडिओ सिलोनात सामील जालो. तांगेली त्या काळांतली गायनाचीं कार्यावळ बरी गाजली. ताचे बदलांत 1937 वर्सा रेडिओ सिलोनांत ताका म्हयन्याक पंचवीस रुपया पगार मेळटालो, जो त्या काळांत चड पगार मानताले. पूण ताचे कडेन भुरगेपणा सावन अभिनयाची प्रतिभा आशिल्ली. रेडिओचेर ओमच्या कार्यावळीचे जायते फॅन आशिल्ले.
ह्याच काळांत ओम प्रकाश एका शीख चलयेच्या मोगान पडलो. ओम ह्या मोगाचें लग्नांत रुपांतर करपाक सोदतालो. पूण तो हिंदू आशिल्ल्यान चलयेचें कुटुंब तांच्या लग्ना आड आशिल्लें. मजगतीं ओम प्रकाशाची आवय दुयेंस पडली आनी तिणें आपल्या पुताक लग्न जाल्लें पळोवपाची इत्सा आसा अशें सांगलें. ओमाच्या व्हडल्या भावान लग्न करपाक न्हयकार दिलो, देखून आवयन ओमान लग्न जावचें अशी अट घाली. एक दीस ओम प्रकाश पानां विकपाचे दुकाना कडेन उबो आशिल्लो. थंय एक बायल ताच्या लागीं आयली आनी आपूण एक विधवा आसून तिका चार चलयो आसात अशें सांगलें. तिका ओमाक जांवय करपाचो आसा आनी तिणें ते संबदी ओमप्रकाशाले आवयशीं उलवणेंय लेगीत केलां, अशें ताका सांगलें. ओम भावनीक जालो आनी लग्न करपा खातीर ताणें मान्यताय दिली. दुसऱ्या दिसा ताणें मोगिकेक मेळून पुराय काणी सांगली. तुमच्या कुटुंबाक हांव आवडना. आतां ते विधवेचो जांवय जाल्यार बरें जातलें, अशें सांगलें. हें आयकून मोगीका तकलेर हात दवरून रस्त्यार कांय खीण बसली आनी घरा गेली. फुडें ती ओम प्रकाशाच्या लग्नाक आयिल्ली.
1942 वर्सा ओम प्रकाश हाणें चित्रपट जगांत प्रवेश केल्ल्याची कथाय उणी मनोरंजक ना. तो एका इश्टाच्या लग्नाक गेल्लो, थंय दलसुख पंचोलीन ताका पळोवन ताचेर सामको प्रभावित जालो. थंयच्यान परत येतकच पंचोलीन ताका टेलिग्राम धाडून आपल्या लाहोरांतल्या ऑफिसांत आपोवन ‘दासी’ (1950) ह्या चित्रपटांत ऐशीं रुपया पगाराचेर ओम प्रकाशा वांगडा सिनेमात काम करपाची कबलात केली. अणभवी नाट्य कलाकार ओम प्रकाश हाणें आपल्या पयल्याच चित्रपटांत आपल्या अभिनय प्रतिभेन नामना मेळयली. फाळणें उपरांत रोखडोच ओम प्रकाश दिल्ली आनी उपरांत मुंबय आयलो. बलदेव राज चोपडाक तागेली प्रतिभा दिसली ती फिल्म पत्रकार आनी समीक्षक आसतना.
लखपती ह्या सिनेमांत खलनायक म्हणून ताका पयलो ब्रेक मेळ्ळो. लाहोर, चार दीन, रात की रानी ह्या चित्रपटांनीय उपरांत भुमिका मेळ्ळ्यो. ओम प्रकाशाल्या चित्रपट कारकिर्दीच्या टप्प्यांत ताणें दिलीप कुमार, राज कपूर आनी मिस मेरी हांचे वांगडा सरगम, किशोर कुमार हांचे वांगडा बहार, पहली झलक, आशा आनी मनमौजी, आझाद, दिलीप कुमार हांचे वांगडा हावडा ब्रिज आनी फिर तेरे घर में ह्या सिनेमांत अशोक कुमारा वांगडा काम केलें. त्या काळांत किशोर कुमार आनी देव आनंद सारकिले बळिश्ट कलाकार आसले तरी चित्रपटांनी ताणें केल्ल्या अभिनया खातीर ताची नामना जाली. ताणें संवाद उलोवपाची आपली एक खाशेली शैली तयार केल्ली, जी ताका फुडल्या चाळीस वर्सां खातीर फिल्म मनरिजवणेच्या संवसारांत व्हड नांव मेळोवन दिवपाची आशिल्ली. सगले मिमिक्री कलाकार थारावीक नटांचे आवाज काडटात. तातूंत ओमप्रकाश हाच्या आवाजाची नक्कल आसताच आसता. आयज पसून लोक तांकां विसरूंक नात.
संगीतकार सी. रामचंद्र हांचे कडेन ओमप्रकाशाची बरी इश्टागत आशिल्ली. दोगांनूय मेळून ‘दुनिया गोल है’, ‘झंकार’, ‘लकीरें ’ हे चित्रपट तयार केले. ते उपरांत ओम प्रकाशान आपली स्वताची फिल्म कंपनी तयार केली आनी ‘भैयाजी’, ‘गेटवे ऑफ इंडिया’, ‘चाचा जिंदाबाद’, ‘संजोग’ चित्रपट तयार केले. ताचो फॅन नाशिल्लो हिंदी सिनेमाचो मोगी कमी. ओम प्रकाशान सुमार तीनशें पन्नास चित्रपटांनी चरित्र अभिनेत्याची भुमिका केल्ली. ‘पडोसन’, ‘जुली’, ‘दस लाख’, ‘चुपके- चुपके’, ‘बैराग’, ‘शराबी’, ‘नमक हलाल’, ‘प्यार किये जा’, ‘ खानदान ’, ‘चौकीदार’, ‘लावारिस’, ‘आंधी’, ‘लोफर’, ‘जंजीर’ आदी सिनेमांतल्या भुमिकांचो तातूंत आस्पाव आसा. ताचो निमाणो सिनेमा ‘नौकर बीवी का’.
अमिताभ बच्चनाच्या ‘नमक हलाल’ ह्या सिनेमांत दद्दू आनी ‘शराबी’ फिल्मांत मुंशीलाल हांचो रोल करून ओम प्रकाशान सिनेमा प्रेक्षकांच्या काळजांत कायम स्वरूपी सुवात मेळयिल्ली. 21 फेब्रुवारी 1998 दीसा 78 वर्साचे पिरायेर ओम प्रकाश संवसाराक अंतरले.
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
