भांगरभूंय | प्रतिनिधी
तुमी तरणाटे आसतना वा जो मेरेन तुमी नोकरी वा वेवसायांत आसात तो मेरेन तुमकां जे पयशे मेळटात ते सांठोवन दवरप आनी ते बर्या गुंतवणूक येवजणेंत गुंतवप खूब गरजेचें. कारण जेन्ना मनीस जाण्टो जावपाक लागता तेन्ना आपल्यो अर्थीक गरजो भागोवपाचे नदरेन गुंतवणूक करप आनी कोणा मुखार हात पातळपाची वेळ येवची न्हय हे खातीर गुंतवणूक करप फायद्याचें. ताचे खातीर पेन्शन येवजण्योय खूब आसात. इतलेंच न्हय तर अशा येवजण्यांनी गुंतवणूक करून आमी जिणेंत येवपी जायत्यो अर्थीक गरजो भागोवंक शकतात आनी पयशे एकठांय जाय जाल्यार तुमकां मुखार पयशांचो उणावूय जाणवचोना.
बँकांच्या येवजण्यां सयत पोस्ट ऑफिसाच्योय म्हत्वाच्यो अश्यो येवजण्यो आसात. हातूंत पोस्ट ऑफिसाची जर आमी मंथली इनकम स्कीम पळयल्यार ही येवजण सामकी म्हत्वाची आसा. हातूंत जर तुमी एकदां गुंतवणूक केली जाल्यार तुमकां दर म्हयन्याक एक निश्चीत इन्कम मेळटली. विशेश म्हळ्यार तुमी हे येवजणे खाला तुमची घरकान्न वा भाव, कुटुंबांतल्या खंयच्याय वांगड्या वांगडा खातें उगडपाक शकतात. तशेंच तातूंत एकठांय जावपी मर्यादाय वाडोवं येता.
ठेवीचेर मेळपी म्हयन्याळी येणावळ
ही एक ठेवी येवजण आशिल्ल्यान दर म्हयन्याक एक ठेवी केल्या उपरांत एक थारावीक रक्कम येणावळ मेळटा. तशेंच हे येवजणेच्या खात्याचेर जें व्याज मेळटा तें दरेका म्हयन्याक पोस्ट ऑफिसच्या सेविंग अकावंटांत भरता आनी इतलेंच न्हय पांच वर्सां उपरांत तुमी जी रक्कम जमा करतात ती रक्कम काडपाकूय शकतात.
पोस्ट ऑफिसाचे हे येवजणेंत सिंगल आनी जॉयंट अकावंट उगडपाचो पर्याय मेळटा. जर तुमकां जॉयंट खातें उगडपाचें आसल्यार तें तुमी दोन वा तीग जाणां मेळून उगडपाक शकतात.
तुमी एका खात्यांत णव लाख आनी जॉयंट अकावंट आसल्यार १५ लाख रुपया जमा करपाक शकतात. जर तुमी आनी तुमची घरकान्न मेळून जोड खातें उगडल्यार व्याजांतल्यान पांच लाखां परस चड उत्पन्न तुमकां मेळपाक शकता.
घोव-बायल वर्साक जोडपाक शकतात व्याजांतल्यान एक लाख
सध्या पोस्ट ऑफिसच्या ह्या मंथली इन्कम स्किमींत ७.४ टक्के दरान व्याज मेळटा. तुमी तुमचे बायले सयत हातूंत १५ लाख रुपया एकठांय केल्यार मेळपी ७.४% व्याजदराक लागून दरेका म्हयन्याक तुमकां ९२५० रुपयांचें निश्चीत उत्पन्न मेळटा.
म्हळ्यार ह्या हिशेबा प्रमाण एका वर्साक एक लाख ११ हजार रुपयांच्या उत्पन्नाची हमी तुमका मेळटा. असो हिशेब केल्यार पांच वर्साक तुमकां पांच लाख ५५ हजार रुपया उत्पन्न मेळटा.
सिंगल खात्यांत कितली रक्कम जमा करूं येता?
समजा तुमी हे येवजणेंत एकूच खातें उगडटात, तातूंत तुमकां चडांत चड णव लाख रुपया जमा करपाक मेळटा आनी हे रकमेचेर दर म्हयन्याक पांच हजार रुपयांचेर पन्नास रुपया व्याज मेळटा. अशे तरेन एका वर्सा व्याज म्हणून ६६ हजार ६०० रुपया मेळूं येतात आनी पांच वर्सांनी निव्वळ व्याजांत ३ लाख ३३ हजार रुपया मेळटले.
हे येवजणेचो फायदो कोणाक मेळटा?
१. देशांतल्या खंयच्याय नागरिकाक टपाल खात्याची म्हयन्याळी येणावळ येवजणेचो लाव घेवंक मेळटा. तशेंच भुरग्याच्या नांवान खातें उगडूंक मेळटा.
२. भुरग्याच्या नांवान खातें उगडपाचें आसल्यार ताचो पालक वा कायदेशीर संरक्षक धा वर्सां परस उणो आसल्यार ताच्या नांवान खातें उगडूंक शकता.
३. भुरग्याक धा वर्सां पुराय जातकच ताका स्वता खातें चलोवपाचो अधिकार मेळूंक शकता.
४. हे येवजणे खातीर टपाल खात्यांत बचत खातें आसप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
