भांगरभूंय | प्रतिनिधी
पणजीः एप्रिल २०२१ वर्सा गोंय पुलिसांच्या घुंवळे वखदां विरोधी पंगडान काळंगूटे धाड घालून नायजेरियन नागरीक मायकल ओकेरो हाका अटक केल्ली. हे विशीं दुबाविता आड पुरावो आशिल्ल्याचें निरीक्षण नोंद करून पणजेचे अतिरिक्त सत्र न्यायाधीश बॉस्को रॉर्बट्स हांणी दुबावीत ओकेरो हांणी दाखल केल्लो जामीन अर्ज भायर मारलो.
हे विशीं गोंय पुलिसांच्या घुवळे वखदां विरोधी पंगडान २ एप्रील २०२१ दिसा गुन्यांव दाखल केल्लो. ते प्रमाण, एएनसीचे तेन्ना उपनिरीक्षक रोहन मडगांवकार हांणी पंगडाचे मजतीन पोरबावाडो – कळंगुटेच्या ग्रीन फिंगर नर्सरी लागसारा २ एप्रील २०२१ दिसा सांजेवेळार सुमार ५.४५ ते ८.५० मजगतीं सांपळो रचिल्लो. तेन्ना थंय दुचाकी घेवन आयिल्लो दुबावीत मायकल ओकेरो ह्या नायजेरीयन नागरिकाक पंगडान तपासलो. तेन्ना ताचे कडल्यान २.८० लाख रुपयांचो १४.४३ ग्रॅम ऍक्टसी पावडर आनी ९.५९ ग्रॅम हिरोयन जप्त केल्लो. उपरांत पंगडान ताचे आड घुवळे वखदां विरोधी कायद्याच्या विवीध कलमां खाला गुन्यांव दाखल करून अटक केल्ली.
उपरांत एएनसीन तपास पुराय करून ३० सप्टेंबर २०२१ दिसा पणजेच्या उत्तर गोंय जिल्लो आनी सत्र न्यायालयांत आरोपपत्र दाखल केलें. हे विशीं सादर केल्ल्या पुराव्याची दखल घेवन न्यायालयान दुबावीत मायकल ओकेरो हाचे आड नोव्हेंबर २०२१ दिसा आरोप निश्चीत करून खटलो सुरु केलो. हे मजगतीं दुबावीत ओकेरो हांणी न्यायालयांत जामीन अर्ज दाखल केलो. हे विशीं न्यायालयांत सुनावणी जाली. तेन्ना दुबावीत ओकेरो हांणी वेवसायीक तरेन ड्रग्ज तस्करी केल्ल्याचें पुरावे न्यायालया मुखार सादर केले. ह्या पुराव्यांची दखल घेवन न्यायालयान ताचो जामीन अर्ज भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
