भांगरभूंय | प्रतिनिधी
पणजी : दोना पावला धाड घालून गोंय पुलिसांच्या घुंवळे वखदां विरोधी पंगडान (एएनसी) ५ लाख रुपयांचो ५ किलो गांजो जप्त केल्लो. जप्त केल्लो गांजो हो किरकोळ स्वरूपाचो आसा. तशेंच अटक केल्ले दुबावीत नितेश सिंग आनी राजू सिंग हे बिगर राज्यांतले आशिल्ल्यान त्या दोगांयकूय बंदखणेंत दवरपाक मेळनाशिल्ल्याचें निरीक्षणांत नोंद करून पणजेच्या अतिरिक्त सत्र न्या. बॉस्को रॉबर्ट हांणी त्या दोगांकूय २५ हजार रुपया आनी हेर अटींचेर जामीन मंजूर केलो.
एएनसीच्या एका अधिकार्यान दोना पावलाच्या जीटीडीसीच्या भायर आशिल्ल्या पार्किंग वाठारांत गांज्याची तस्करी जावपाची म्हायती गुप्तहेरांनी एएनसीच्या एका अधिकार्याक दिल्ली. ते प्रमाण एएनसीच्या पंगडान १३ सप्टेंबराक रातच्या सुमार ८.४५ ते रातचें ०.१५ वरांचेर सांपळो रचलो. उपरांत वयर दिल्ले सुवातेर दोन तरणाटे दुबावीत तरेन भोंवतना पंगडाक दिसले. मागीर पंगडान नितेश सिंग हांची तपासणी केली. तांचे कडल्यान एके बॅगेंत आशिल्लो ५ किलो गांजो जप्त केलो. ह्या गांजाचें बाजार मोल पांच लाख रुपया आशिल्ल्यान त्या दोगांय कडल्यान १,५०० रुपया जप्त केले. उपरांत राजू सिंग हांची तपासणी केली तेन्ना तांचे कडल्यान कांयच सांपडूंक ना. मात ते दोगूय गोंयांत आयिल्ल्यान त्या दोगांय आड घुंवळे वखदां आड कायद्याचे कलम खाला गुन्यांव दाखल करून अटक केली.
उपरांत न्यायालयान त्या दोगांकूय पुलीस बंदखण दिली. ती सोंपल्या उपरांत न्यायालयीन बंदखण मेळ्ळी. मजगतीं दोगांय तरणाट्यांनी पणजेच्या उत्तर गोंय जिल्लो आनी सत्र न्यायालयांत जामीन अर्ज दाखल केलो. ह्या प्रकरणांत तांचे वतीन ऍड. कौतूक रायकार हांणी बाजू मांडली. ते प्रमाण, एका दुबाविता कडल्यान जप्त केल्लो गांजो किरकोळ स्वरूपाचो आसा. तशेंच ते दोगूय गोंयां भायले आशिल्ल्यान न्यायालयान अटी घालून जामीन दिवपाची मागणी केली. हे विशीं न्यायालयान दोनूय बाजू आयकून घेतल्या उपरांत वयलें निरीक्षण नोंद करून दोगांय दुबावितांक २५ हजार रुपयांच्या आनी हेर अटींचेर सशर्त जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
