भांगरभूंय | प्रतिनिधी
आमचें मोगाचें गोंय, आमचें भांगराळे गोंय खंय पावलां तेंच समजना. मोग सोंपलो, कांय भांगर सोंपलें अशें हुमाणें पडलां. शारांत वचात, गांवांत वचात, थंय सगळे जाण उलयतात त्यो धंद्याच्यो गजाली. कसलोय धंदो जावं, पोट भरपाक जाय. धंदो करून इतलो पयसो मेळूंक जाय की, मोजमजा करपाक आडखळ येवंक जायना. शेता करप म्हणजे कश्ट करप, चड शिकप म्हणजे तकलेर पेज घालप. भाजी विकप, तांतयां विकप, गाडो घालून च्या-पाणी, बटाटवडे, भजीं विकप हो बरो धंदो न्हय? पूण ताका मान ना. पयशेय जाय तितले मेळनात आनी त्या भायर तें कश्टाचें काम. सरकारा कडेन नोकरी मागप म्हणजे लाखांनी रुपया आसचे पडटा. सर्टिफिकेट घाल चुलींत. त्या कागदा परस गांधीचें चित्र आशिल्लें कागद चड मोलादीक. त्या लाखां खातीर रीण काडचें पडटा. फुडार्यांचीं बोल्सां भरचीं पडटात. म्हारगाय तेंगशेर पावल्या. जगप कशें. सामको सोंपो उपाय लोकांनी सोदून काडला. तरणाटे पिळगेक एक सादो मार्ग सांपडला. कश्ट करपाची गरज ना, भांडवलूय नाका. सरकाराचे परवाने नाकात, सरकारी ऑफिसांनी फावटी घालून हाका-ताका खावंक घालपाची गरज ना. गोंयांत सोंपो धंदो जाला तो घुंवळे वखदांचो. कोण खंयच्यान हाडटा, तें कळना. हातांत पडलें काय गिरायक सोदपाक कळाव लागाना. हो धंदो कोण चलयता खबर ना, ती आसपाचीय गरज ना. पॅडलर नांवान जांकां
वळखतात, ते एक फावट मेळ्ळे की धंद्याक मरण ना.
गोंयांत घुंवळे वखदां मेळना असो गांव आसचो ना. खंयच्याय दोंगरार, दर्यादेगेर भोंवपाक वचत तर दुबावीत दिसपी मनीस खूब दिसतात. ते घुंवळे वखदाचे गिरायक काय ते विकपी हें कळपाक मात्सो कळाव लागता. आतां तेंय सोंपें जालां. रेस्टॉरंट, क्लब्स हातूंत सोरो पिवंक वचत, नाचूंक वचत तर सोंपेपणीं थंय ड्रग्ज मेळटा. केन्नाय तरी व्हडलो म्युझीक शो जाता, तेन्ना लोक सोरो पियेल्यात काय घुंवळे वखदां तांणी घेतल्यांत तें कळना. 2008 वर्सा स्कार्लेट किलिंग ही अस्तुरी दुबावीत तरेन मेली. उपरांत नेहा बहुगुणा, इशा मंत्री, मोनिका घुर्डे ह्यो अस्तुरोय अश्योच मेल्यात. आतां सोनाली फोगट हांकां तशेंच मरण आयलें. ह्यो सगळ्यो अस्तुरी आपल्या मळार नांव जोडिल्ल्यो सेलेब्रिटीय, तांचीं नांवां भायर आयलीं, चर्चेक आनी चवकशेक फुडें आयलीं. सगळ्यां मदीं एकूच सारकेपण आनी तें म्हणजे ड्रग्ज. हीं घुंवळे वखदां खंयच्यान येतात, तीं खंय मेरेन पावतात हाची खबर पुलिशेक ना. गोंयच्या एण्टी नार्कोटिक्स एजन्सीकूय ना अशें म्हणटात. पुलीस खात्यात नवी भरती जायत आसा, नव्यो बडट्यो जायत आसात. कितलेशेच निरिक्षक आनी अधिक्षक तयार जाल्यात. जशीं पदां वाडलीं, घुंवळे वखदांचो धंदोय वाडलो. खून, झगडीं, टोळयां मदलीं झगडीं वाडलीं. घुंवळे वखदांचो धंदो करपाक स्पर्धा लागल्या. गोंयचे लोक स्वयंपूर्ण आनी आत्मनिर्भर जावपाक अशी वाट सोदतले, अशे सपनांत लेगीत दिसले ना, पण ही सामकी खरी गजाल.
आमचो देश खंय एक व्हडली बाजारपेठ. ह्या देशांत सुमार आठ-धा कोटी लोक घुंवळे वखदां घेतात. म्हयन्याक खंय पांच हजार लोकांक पुलीस धरतात. गोंयांत सुमार 20-25 लोकांक पुलीस अटक करतात. नव्या वर्सांत स म्हयन्यांत आमी 2.5 कोटींची 100 किलो घुंवळे वखदां धरलीं, त्या खातीर
65 जाणांक अटक केली, अशी म्हायती दिताना पुलिशेक लज दिसना. आमी
आमचें काम करता न्हय, ही वयल्यान शाणपणां.
हीं घुंवळे वखदां येतात खंयच्यान, हाडटा कोण, दिता कोणांक आनी विकता कोण हें सोदपाचें काम कोणाचें. इतली म्हायती नाजाल्यार आमकां पुलीस जाय कित्याक आनी गृह खातें तरी कितें करता, तेंच समजना. ड्रग्ज ओव्हरडोस जावन मनीस मरता, पूण हें सांगपाक पुलीस तयार ना. सोनाली फोगट हिचो पोस्टमार्टम रिपोर्ट हाचे संबंदी कितें सांगता तें लोकांक कळटलें काय ना? हो धंदो चालू दवरपाक कोणाक इंटरेस्ट आसा ताचो सोद लावचो पडटलो. कित्याक पुलीस मनांतल्यान हाचे आड झूज करिना हें समजावन घेवचे पडटले. हें जो मेरेन जायना, तो मेरेन आमचे तरणाटे हाचे फाटल्यान धांवत रावतले. तोच धंदो बरो अशें तांकां दिसतले. कॅसिनोन काम केल्ल्यान मेळटा तसो पयसो हांगाय मेळटा, जाल्यार हे तरणाटे आनी तांकां लागून गोंयांत धांवून येवपी देशा भायले, देशा भितरले पर्यटक हांचो आंकडो वाडटलोच. घुंवळे वखदांचें गोंय पर्यटन मळार चमकता, हाचें कारण न्हय हांगासल्ली दर्यादेग वा सैम. हांगा आसा तो नरक, जाका आमी आतां मेरेन सर्ग समजत आयल्यात. हैद्राबादच्यान पुलीस येतात,
पॅडलराक घेवन वतात, केंद्रीय यंत्रणा छापे घालता, आमी मात सुशेगाद. नवी पिळगी ह्या धंद्यांत पडल्या. तेंय जेन्ना हीं वखदां घेतले, तेन्ना सगळे हाताभायर वतले. केन्ना आमचे दोळे उक्ते जातले, हें सरकार सांगिना, कित्याक तर ही नितळसाण
मोहीम कितली कठीण हें आमच्या फुडार्यांक खबर आसा, पूण नशीब आमचें फुटकें.
मुख्यमंत्री प्रमोद सावंत हांणी सरकार तीन म्हयन्यांनी ड्रग्ज धंदो बंद उडयतलो अशें उतर गोंयकारांक दिला. नेट लायत जाल्यार गोंयच्या पुलिसांक हें कठीण ना. दिसा उजवाडे मेजा आनी गाडे घालून मटको सुरू आसतानाय, ह्या राज्यांत
मटको नाच, तो सोंपयलो अशें
न्यायालयाक फटी सांगपी खातें, घुंवळे वखदांचो धंदो बंद करतले, हाचेर विस्वास कसो दवरपाचो?
(लेखक ज्येश्ठ पत्रकार आसात.)
गंगाराम केशव म्हांबरे
8390917044
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
