भांगरभूंय | प्रतिनिधी
पणजी, प्रतिनिधी : गोंय पुलिसांच्या घुंवळे वखदां विरोधी पंगडान (एएनसी) वागातोर छापो घालून विश्वास उर्फ संजय आगरवाडेंकार (झरवाडो – हणजूण) हाका अटक केली. ताचे कडल्यान १८.३० लाख रुपयांचो १.२ किलो चरस, २.३ किलो गांजो आनी १०० ग्रॅम ऍक्टसी जप्त केल्लो. तपासांत ड्रग्साचो अहवाल सकारात्मक आयला. तशेंच ड्रग्ज वेवसायीक स्वरूपाचें आशिल्ल्याचें निरीक्षण नोंद करून म्हापशेंच्या अतिरिक्त सत्र न्यायालयान दुबावीत आगरवाडेंकार हाचो जामीन भायर मारला. हे विशींचो आदेश अतिरिक्त सत्र न्या. शर्मिला पाटील हांणी दिलो.
हे विशीं एएनसीन ७ फेब्रुवारी २०२४ दिसा गुन्यांव दाखल केला. ते प्रमाण, एएनसीक वागातोरा बेसबॉल कोर्ट लागसारा एक व्यक्ती घुंवळे वखदां तस्करी खातीर येतली अशी म्हायती मेळिल्ली. ते प्रमाण एएनसीचे अधीक्षक बॉसिएट सिल्वा आनी उपअधीक्षक नेर्लोन आल्बुकर्क हांच्या मार्गदर्शनाखाला निरीक्षक संजित पिल्ले हांच्या फुडारपणा खाला तेन्नाचे उपनिरीक्षक दिनदयाळनाथ रेडकार, हवालदार उमेश देसाय, कॉन्स्टेबल नितेश मुळगांवकार, लक्ष्मण म्हामल, संदेश वळवयकार, सुमीत मुटकेकार, मकरंद घाडी, कुंदन पटेकार आनी हेर पंगडान वयर दिल्ले सुवातेर बुधवार ७ फेब्रुवारी २०२४ दिसा सकाळीं ३ ते ६.१५ मजगतीं सांपळो रचिल्लो. तेन्ना एकलो थंय आयलो. ताणें आपूण विश्वास उर्फ संजय आगरवाडेंकार आशिल्ल्याची म्हायती दिली. ताची झडती घेतली तेन्ना, ताचे कडल्यान पंगडान १८.३० लाख रुपयांचे ड्रग्स जप्त केलें. उपरांत उपनिरीक्षक सुनील फालकार हांणी दुबावीत आगरवाडेंकार हांचे आड गुन्यांव दाखल करून अटक केल्ली. उपरांत ताका न्यायालयान पयले पांच दीस बंदखण दिली. ती सोंपल्या उपरांत ताका न्यायालयीन बंदखणींत धाडलो.
मजगतीं, दुबाविताची भलायकी इबाडिल्ल्याचें कारण सांगून पणजेच्या उत्तर गोंय जिल्हो आनी सत्र न्यायालयांत जामीन अर्ज दाखल केलो. तातंत तांणी विश्वास हाका गोडेंमुताचो आनी कोलेस्टेरॉलाचो त्रास आशिल्ल्यान नेमान वखदां आनी उपचाराची गरज आशिल्ल्याचो दावो करून जामीन मंजूर करपाची मागणी केली.
मजगतीं, दुबाविताक न्यायालयीन बंदखणींत नेमान वखदां आनी ताचेर उपचार सुरू आसात अशी म्हायती सरकारी वकील आर. बॅरोटो हांणी न्यायालयांत दिली. तांणी दुबाविता कडल्यान जप्त केल्लो ड्रग्सचो अहवाल पयलेच फावट सकारात्मक आयिल्ल्याचो तशेंच ड्रग्स वेवसायीक स्वरूपाचे आशिल्ल्याचो युक्तिवाद केलो. दुबावीत ताच्या बँक खात्याची तशेंच हेर म्हायती दिता अशी म्हायती दिवन ताचो जामीन भायर मारपाची मागणी केली. ह्या प्रकरणांत न्यायालयान दोनूय पक्षांची बाजू आयकून घेतल्या उपरांत वयलें निरीक्षण नोंद करून जामून भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
