घाणयारें उदक उक्ते सुवातेर सोडपी लोकांक नोटीस

भांगरभूंय | प्रतिनिधी

मडगांव, प्रतिनिधी ः मडगांव पालिका वाठारांतल्या 79 घरगुती आनी 50 वेवसायीक आस्थापनांनी मडगांव पालिकेन धाडिल्ले नोटिसीक जाप दिवंक ना. घाणयारें उदक उक्ते सुवातेर आनी गटारांनी सोडपी ह्या लोकांक कारणां दाखयात नोटिसो धाडिल्ल्यो. ह्या सगल्या आस्थापनांक आतां उदका पुरवण आनी वीज कनेक्शन तोडपा संबंदी पालिकेन नोटीस धाडल्या.
घाणयारें उदक गटारांत आनी उक्ते सुवातेर सोडपी लोकांचेर दंडात्मक कारवाय करपाची तरतूद आसा. ते प्रमाण सिवरेज सुविधा आशिल्ल्या वाठारांतल्या लोकांनी जोडणी खातीर अर्ज करचे. सुविधा आसून लेगीत घाणयारें उदक उक्त्या सुवातेर सोडले जाल्यार पयल्या तीन म्हयन्यां खातीर उदकाच्या बिलांत 25 टक्के चड दंड घेतले, उपरांत 50 टक्के दंड घालतले. पूण जोडणी घेतली ना जाल्यार उदका जोडणी बंद करपाची नोटीस जारी करतले अशें मडगांव पालिकेचे मुखेली गौरीश शंखवाळकार हांणी सांगलें.
हाचे आदीं केल्ल्या सर्वेक्षणा उपरांत पालिके कडल्यान 287 आस्थापनांक आनी घरांक कारणां दाखोवपाची नोटीस धाडिल्ल्यो. तांचे कडल्यान मेळिल्ल्या जापांचेर अहवाल बांदकाम खात्याक दिला. ह्या लोकांक जोडणी दिवपाक मेळटा काय तें पळोवपाक सांगलां. जोडणी दिवंक मेळटा जाल्यार दिवची, नाजाल्यार आनीक खंयचे उपाय करूं येतात तें करचें. ज्या घरगुती आनी वेवसायीक आस्थापनांनी मडगांव पालिकेन धाडिल्ले नोटीसीक जाप दिवंक ना अशा 79 घरगुती आनी 50 वेवसायीक आस्थापनांक वीज जोडणी आनी उदका जोडणी बंद करपा संबंदी पालिके कडल्यान नोटीस धाडल्यात अशी म्हायती मुखेल अधिकारी शंखवाळकार हांणी दिली.

98 हॉटेलांक, रेस्टॉरंटांकय कोयर संबंदी नोटीस

गोंय घन कोयर वेवस्थापन कायद्याच्या तरतुदी प्रमाण मडगांव पालिकेन पालिका वाठारांतल्या 25 किलो परस चड कोयर तयार करपी 98 ल्हान व्हड रेस्टॉरंट आनी हॉटेलांकय नोटीस जारी करून चड फारीक करपाक सांगलां. घन कोयर वेवस्थापन कायद्या प्रमाण दिसाक 25 किलो परस चड कोयर तयार करपी हॉटेलांनी कोयराचेर प्रक्रिया करची पडटा. पूण तशें करना जाल्यार पालिके कडल्यान सप्तकभर निरिक्षण नोंद करुन कायद्या प्रमाण 25 किलो वयर दरेक किलो फाटल्यान 8 रुपया दंड सरासरी रक्कम भरपा खातीर नोटीस धाडला. हाचे वयल्यान पालिकेक सुमार देड कोटी दंड मेळटलो असो अदमास आसा.