भांगरभूंय | प्रतिनिधी
मुंबय, खबरां संस्था: मुंबय जाल्ल्या वादळ वार्याक लागून घाटकोपरचो बरोच व्हड लोखणाचो जायरात तकटो पेट्रोल पंपाचेर कोसळ्ळो. ह्या अपघातांत आतां मेरेन १४ जाणांक मरण आयलां. १४० बाय १४० चौरस फुटांचो हो तकटो कांय खिणां भितर कोसळिल्ल्यान लागीं आशिल्लीं वाहनां आनी शंबरां परस चड नागरीक तकट्या पोंदा सांपडले. ह्या अपघातांत ७४ जाण जखमी जाले. ताका लागून वट्ट पिडेस्तांचो आंकडो ८८ जाल्या.
पूर्व द्रुतगती मार्गार छेडानगर वाठारांत पेट्रोल पंपा लागसारा आशिल्लो तकटो मुळांतल्यान हुमटून लोखणाचो खांबो जमनीचेर आदळ्ळो. पावस पडिल्ल्यान पेट्रोल पंपाच्या वाठारांत खुबशे वाहनचालक, चलत वचपी आडोसाक राविल्ले. तांचेरूच हो तकटो पडिल्ल्यान तातूंत खुबश्या जाणांक मरण आयलें. हें चित्र सामकें भिरांकूळ आशिल्लें. पुलीस, उजो पालोवपी दळ, एनडीआरएफ, बीपीसीएल, महानगर गॅस आनी अदानी इलेक्ट्रिसिटी ह्या प्राधिकरणांचो पंगड घडणुके सुवातेर दाखल जालो. रातच्या उसरां मेरेन मजत करपाचें काम सुरू आशिल्लें. तखटो लोखणाचो आशिल्ल्यान क्रेन बगर तो कुशीक काडप वा उखलप अशक्य आशिल्लें. ताका लागून तकटो पडलो तरी बरोच वेळ मदत करप सुरू जावंक ना. हाचे मजगतीं बारीक सारीक दुखापत जाल्ल्यांक रोखडेच राजावाडी हॉस्पिटलांत दाखल केले. ह्या वेळार होर्डींगा पोंदाक चिड्डले खुबशे जाण मदती खातीर आड्डताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
